पोखरा । रामघाट महिला समूह पोखरा १० र १२ ले असोज १ गते गीता मन्दिर प्रांगणमा आयोजना गरेको तीज गीत प्रतियोगितामा मेट्रोपोलिटन एकेडेमी प्रथम भएको छ । कालिका नमुना मावि द्वितीय, सिद्धाश्रम शक्ति केन्द्र तृतीय र गंगा शर्माको समूह म्याग्दी सान्त्वना स्थानमा रहे । उक्त प्रतियोगितामा जम्मा १२ टिमबीच प्रतिस्पर्धा भएको थियो ।

उत्कृष्ट नृत्यमा शिवपुरी आमा समूह र उत्कृष्ट भेषभूषामा बुद्धचोक महिला समूह पुरस्कृत भए । दर्शकमध्ये बाट उत्कृष्ट नृत्यमा रमिला शौखी र बाल नृत्यमा साम्राज्ञी सुवेदीले पुरस्कार हात पारे ।

निर्णायक मण्डलमा लोकगायक चोलेन्द्र पौडेल, गायिका सरस्वती लामिछाने र प्रतिभा शर्मा रहेका थिए । मेट्रोपोलिटन स्कुलका विद्यार्थीले स्वागत नृत्य प्रस्तुत गरेका थिए ।

रामघाट महिला समूहकी अध्यक्ष दुर्गा केसीको अध्यक्षतामा भएको कार्यक्रममा प्रमुख अतिथि सरस्वती गुरुङ रहेकी थिइन् । समूहकी संरक्षक अनिता तिमिल्सिनाले स्वागत र सचिव जानुका अधिकारीले कार्यक्रम सञ्चालन गरेका थिए ।