पोखरा । हेमजास्थित विष्णुपादुका क्लबको आयोजनामा भएको तीजगीत प्रतियोगितामा उत्कृष्ट ५ समूह छनोट गरी पुरस्कृत गरिएको छ ।

छनोटमा पर्ने समूहमा माछापुच्छ्रे सेवा समाज, राधाकृष्ण आमा समूह, नवजागरण आमा समूह, दिदीबहिनी समूह र लक्ष्मी आमा समूह छन् । ती समूहलाई नगद ५ हजार रुपैयाँसहित प्रमाणपत्र प्रदान गरियो ।

त्यस्तै सुनझाँक्री आमा समूह, सिद्धी विनायक आमा समूह तथा नारायणी दिदीबहिनी समूहलाई प्रोत्साहन पुरस्कार प्रदान गरियो ।

त्यस अवसरमा भएको बेलुन फुटाइ प्रतियोगितातर्फ क्रिस्टल गुरुङ प्रथम र रयन्स परियार द्वितीय, घैंटो फुटाइमा विश्वास तिम्सिना पहिलो र प्रदिप श्रेष्ठ दोस्रो, टायरमा बल छिराउने खेलमा सम्मर नेपाली उत्कृष्ट, म्युजिकल चियरतर्फ कमला भट्टराई प्रथम र आरोष थापा दोस्रो भए ।

त्यसैगरी जोडी नृत्यतर्फ पूजा तिम्सिना र वर्षा क्षत्री पहिलो साथै विनीता सुनार र कुशुम सुनारको जोडी दोस्रो भए । रस्साकस्सीतर्फ राधाकृष्ण आमा समूह प्रथम र सुनझाक्री आमा समूह द्वितीय हुन सफल भएको क्लब अध्यक्ष सुविन श्रेष्ठले जानकारी दिए ।

कार्यक्रममा पोखरा २५ का वडाध्यक्ष तथा महानगरपालिका प्रवक्ता मोतिलाल तिम्सिनाले तीजलाई संस्कृतिक पर्व बनाउनुपर्नेमा जोड दिर्दै भड्किलो पनलाई भने यथाशीध्र छाड्दै जानुपर्ने औँल्याए । उनले क्लबले कार्यक्रम गरेकोमा खुशी व्यक्त गर्दै निरन्तरता दिनुपर्ने धारणा राखे ।

क्लब सचिव वसन्तकुमार श्रेष्ठले क्लवले मेला महोत्सवलाई प्राथमिकता दिर्दै आइरहेको स्पष्ट पार्दै त्यस्ता क्रियाकलापलाई निरन्तरता दिने प्रतिबद्धता जनाए ।

क्लब सदस्य तथा कार्यक्रम संयोजक शान्ता केसीको अध्यक्षतामा भएको उक्त कार्यक्रममा महिला समूह सदस्य सिर्जना सापकोटाले स्वागत तथा सञ्चालन महिला समूह सदस्य बगवती बजगार्इं तथा कलाकार परशुराम अधिकारीले गरे ।