नेपाली जनताको लामो संघर्ष र बलिदानपछि २०७२ असोज ३ गते आजकै दिन संविधान सभाबाट ‘नेपालको संविधान २०७२’ घोषणा भएको थियो । यो संविधानले नेपालको राष्ट्रिय सार्वभौमसत्ता नेपाली जनतामा निहित भएको छ र राज्यशक्तिको स्रोत जनता भएका छन् । वर्तमान संविधानले निरंकुश र केन्द्रीकृत राज्य व्यवस्थाबाट सिर्जित सबै प्रकारका विभेद र उत्पीडनको अन्त्य गर्दै जातीय, भाषिक, धार्मिक, सांस्कृतिक तथा भौगोलिक विविधतायुक्त नेपाली समाजलाई राष्ट्रिय एकताको सूत्रमा आबद्ध गरेको छ ।

अब मुलुकलाई सामाजिक न्यायसहितको आर्थिक समृद्धिको दिशातर्फ अघि बढाउनुपर्ने दायित्व हाम्रो काँधमा छ । संविधानमा व्यवस्था भएअनुसार संघ, प्रदेश र स्थानीय तहलाई शक्ति र स्रोतको बाँडफाँट गर्दै संघीय प्रणालीलाई संस्थागत गर्नुपर्ने प्रमुख दायित्व हामीमाथि छ । संविधानको संरक्षण र संघीय लोकतान्त्रिक गणतन्त्रात्मक शासन प्रणालीलाई सुदृढ गर्दै गण्डकी प्रदेश र सिंगो मुलुकलाई आर्थिक विकासको मार्गमा अग्रसर गराउनु आजको आवश्यकता हो । संविधानको भावनालाई जनताको जीवनमा महसुस हुने गरी कार्यान्वयन गर्न प्रदेश सरकार प्रयत्नशील छ । यसका लागि संघ र स्थानीय सरकारसँग निरन्तर सहकार्यको जरुरी छ ।

मुलुकको अग्रगामी परिर्वतनका लागि अमूल्य जीवन उत्सर्ग गर्नुहुने सम्पूर्ण महान् सहिदप्रति हार्दिक श्रद्धाञ्जली अर्पण गर्दछु । साथै, मुलुकमा लोकतान्त्रिक शासन प्रणाली स्थापना गर्न विभिन्न कालखण्डमा भएका संघर्षमा शारीरिक, भौतिक, आर्थिक र मनोवैज्ञानिक क्षति व्यहोर्नु भएका व्यक्ति, राजनीतिक दलका नेता र कार्यकर्ता तथा नागरिक समाजका अगुवाप्रति उच्च सम्मानसहित स्मरण गर्दछु ।

सबै प्रदेशवासी, सबै नेपाली दिदीबहिनी तथा दाजुभाइ एकताबद्ध भई मन, वचन र कर्मले संविधानको मर्म र भावनालाई व्यवहारमा रूपान्तरण गर्नमा लाग्नु हुनेछ भन्ने विश्वाससहित संविधान तथा राष्ट्रिय दिवसको शुभकामना व्यक्त गर्दछु ।