लोमान्थाङ । मुस्ताङ गल्फ च्यालेन्ज उपाधि साविक विजेता श्याम तामाङले जितेका छन् । ‘स्टेबल फोर्ड’ फम्र्याटमा खेलाइएको खेलमा उनले एक अन्डर १९ अंकका साथ उपाधि जितेका हुन् । उनले ३ पार र ५ बुगी हिर्काए ।
अघिल्लो वर्ष उनले २४ अंकसहित उपाधि जितेका थिए । प्रतियोगितामा पोखरेली गल्फर लिलाजङ गुरुङ दोस्रो भए । ९ होलमा भएको खेलमा गुरुङले ‘लेवलपार’ १८ अंकको स्कोर बनाए ।

विश्वकै सर्वाधिक उचाइ दाबी गरिएको कोर्स लोवथाङस्थित ४ हजार ६ सय ४५ मिटरमा छ

महिलातर्फ उपाधि पोखरेली गल्फरले जितेकी छिन् । २ पार र ४ बुगी हिर्काएकी जूनी गुरुङले १५ अंक पाइन् । काठमाडौंकी सुस्मा सिंह १३ अंकका साथ दोस्रो भइन् । प्रतियोगितामा रविन राना ‘बेष्ट ग्रस’ बन्न सफल भए । रानाले २ गल्फरलाई पछि पार्दै बेस्ट ग्रसको उपाधि रक्षा गरेका हुन् । रविनसहित याम राना र पिवी राईको समान ११ अंक रहे पनि काउन्ट ब्याकमा उपाधि रक्षा गरे ।

मोस्ट बर्डिजको उपाधि आत्माराम सिंखडाले जिते । उनले एक बर्डिज हिर्काएका हुन् । ‘क्लोजेस्ट टु दि पिन’ मेजर विजय मोक्तान र ‘लङ्गेस्ट ड्राइभ’ माधव सिंखडाले हिर्काए । सिनियरतर्फ उपाधि पोखराका बलराम थापाले जिते । ६१ वर्षीय थापाले १६ स्कोर गरेका थिए । विश्वकै सर्वाधिक उचाइ दाबी गरिएको कोर्स लोवथाङस्थित ४ हजार ६ सय ४५ मिटरमा छ ।

च्यालेन्जमा २४ पुरुष र ४ महिला गरी २८ गल्फरबीच प्रतिस्पर्धा भएको थियो । पोखरा, काठमाडौं, धरान, बुटवललगायत सहरका गल्फर मुस्ताङ पुगेका हुन् । विजेतालाई मुस्ताङ गल्फ कोर्सका म्यानेजिङ डाइरेक्टर तथा पूर्व सांसद इन्द्रधारा विष्ट, लोमान्थाङ गाउँपालिका अध्यक्ष टसी न्हुर्वु गुरुङ, नेपाल गल्फ संघ उपाध्यक्ष पवित्रकुमार कार्कीलगायतले ट्रफी वितरण गरेका थिए । प्रतियोगितामा होल इन वानको लागि घोडा पुरस्कार राखिएकोमा कसैले पनि उक्त पुरस्कार जित्न सकेनन् ।

गल्फ च्यालेन्जको लोमान्थाङका युवराज झिग्मी ढिण्डुप फोन्छुक परवल विष्टले ‘टी अफ’ गरेर उद्घाट गरे । प्रतियोगिताकै लागि नेपाल गल्फ संघका केन्द्रीय सदस्य भुवहादुर गुरुङ (भुवन) सहितको प्राविधिक टोली १ साताअघि लोमान्थाङ आइपुगेको थियो । पुरस्कार वितरणपछि विष्टले नेपालमा नयाँ पहिचानरुपमा मुस्ताङ गल्फ कोर्सलाई दर्ज गर्न अभियान चलाएको बताए ।

‘नेपालमा विश्वकै सर्वोच्च शिखर सगरमाथा छ । लुम्बिनी पनि नेपालको अर्को परिचय हो,’ उनले भने, ‘अब विश्वकै सर्वाधिक उचाइको गल्फ कोर्स भएको नेपाल हुनेछ । हामी गिनिज बुकमा नाम लेखाउने प्रक्रियामा छौं ।’ मुस्ताङ गल्फ कोर्स दर्ता गरिसकिएको र जग्गा प्राप्तिका लागि सम्बन्धित निकायमा निवेदन बुझाएको उनले बताए ।

यसअघि सिक्किमको याक गल्फ कोर्स सबैभन्दा उचाइको कोर्सको रुपमा स्थापित छ । यो कोर्स ३ हजार ९ सय मिटर उचाइमा छ । विष्टले आगामी दिनमा प्रोफेसनल गल्फरलाई समेत मुस्ताङ पु¥याउने दाबी गरेका छन् । अहिलेसम्म एम्योचर गल्फरबीचमा मात्रै प्रतिस्पर्धा भएको छ ।