पोखरा । पोखरा–३ नदीपुरस्थित बालमन्दिर माध्यमिक विद्यालयको ५९ औं वार्षिकोत्सव तथा पुरस्कार वितरण समारोह शुक्रबार सम्पन्न भएको छ ।

कार्यक्रममा गण्डकी प्रदेश सरकार सामाजिक विकास तथा स्वास्थ्य मन्त्री सुशीला सिंखडाले प्रदेश सरकार समग्र शिक्षा विकासको पक्षमा रहेको उल्लेख गर्दै विद्यालयको भौतिक निर्माणमा पनि सहयोग गर्ने बताइन् । उनले बालमन्दिरबाट शैक्षिक व्यवस्थापनको पाटो अन्य विद्यालयले पनि सिक्नुपर्ने औंल्याउँदै विद्यार्थीलाई अनुशासित बन्न सुझाव दिइन् ।

नेपाल बालसंगठन कास्की सभापति वामदेव ढुंगाना, शिक्षा विकास निर्देशनालय गण्डकी प्रदेशका निर्देशक अम्बिका आचार्य, पोखरा ३ का वडाध्यक्ष प्रकाशमान उदास, शिक्षा विकास समन्वय इकाई कास्की प्रमुख लोकनाथ आचार्य लगायतले बोलेका थिए ।

प्रधानाध्यापक सुशील बस्नेतले थुपै चुनौतीबीच हालसम्म शैक्षिक नतिजा सन्तोषजनक आइरहेको छ भन्दै विद्यालयमा आर्थिक तथा भौतिक समस्या रहेको स्पष्ट पारे । उनले ७५ जनामध्ये २२ जना शिक्षक कर्मचारीमात्रै सरकारी सेवा सुविधा उपयोग गर्ने रहेको तथ्य अगाडि सार्दै शिक्षक व्यवस्थापन तथा भौतिक विकासमा ध्यान दिन प्रदेश सरकारको ध्यानाकर्षण गराए ।

कार्यक्रमका बीच २० वर्ष सेवा गरेका शिक्षक तिलकबहादुर कार्की, सीमा पराजुली साथै कर्मचारी शारदा थापा तथा विभिन्न अक्षयकोषदातालाई सम्मान गरियो ।

त्यस्तै विज्ञान प्रदर्शनी हुनका साथै विद्यार्थीले नृत्य तथा नाटक देखाए । नर्सरीदेखि कक्षा १२ सम्म उत्कृष्ट जिपिए हासिल गर्ने विद्यार्थीलाई शैक्षिक पुरस्कार वितरण गर्नुका साथै विभिन्न ९ कोषबाट छात्रवृत्ति पनि प्रदान गरियो । त्यस्तै बालदिवस समेत मनाइयो ।

विद्यालयका अध्यक्ष वसन्तलाल कतिलाको अध्यक्षतामा भएको कार्यक्रममा विद्यार्थी रक्षा शर्माले स्वागत तथा विद्यार्थीहरू वीरेन्द्र श्रेष्ठ, रचना भट्टराई, विपाशना भण्डारी, रक्षा सुवेदी, स्वस्तिका पौडेल, कुशल पौडेल, पल्लवी वस्ताकोटी र सदीक्षा पौडेलले संयुक्त रुपमा कार्यक्रम सञ्चालन गरेका थिए । विद्यालयमा कुल १ हजार ३ सय ५० विद्यार्थी अध्ययनरत छन् ।