पोखरा । पोखरा आदर्श माध्यमिक विद्यालयको रजत जयन्ती अवसरमा जिल्लास्तरीय कविता प्रतियोगिता शुक्रबार सम्पन्न भयो ।

गण्डकी प्रज्ञा प्रतिष्ठानको सहकार्यमा भानु सभाहलमा भएको प्रतियोगिताको नेपाल संगीतक तथा नाट्य प्रज्ञा प्रतिष्ठानका पूर्व कुलपति सरुभक्तले उद्घाटन गरे । उनले बालबालिकाहरुको नेपाली साहित्यप्रति अभिरुचि रहेकोमा खुसी व्यक्त गरे । नेपाली कविता, गीत, नाटकजस्ता साहित्यिक विधामा राज्यले पनि यसको संरक्षण र सम्बद्र्धनमा लाग्नुपर्ने बताए ।

कुसे औंसी सन्दर्भमा बाबुको गरिमा अनि महत्वसँग सम्बन्धित रहेर विद्यार्थीले कविता वाचन गरेका थिए । ३५ विद्यार्थीले भाग लिएको प्रतियोगितामा भास्कर स्कुल रोजी रानाभाट प्रथम भइन् ।

फिस्टेल माविकी सन्तोषी ढकाल द्वितीय, पोखरा आदर्श माविकी संस्कृति सुवेदी तृतीय र गुप्तेश्वर महादेव वेद विद्याश्रमका यादव पौडेल र राष्ट्रिय मा।विका विश्व अधिकारीले सान्त्वना स्थान हासिल गरेका थिए । उनीहरुलाई क्रमश: ८ हजार, ६ हजार, ४ हजार र १ हजार साथमा प्रमाणपत्र प्रदान गरिएको थियो ।

निर्णायकमण्डलतर्फ संयोजक प्राडा जगन्नाथ रेग्मी थिए भने सदस्यमा अनुराग अधिकारी र जूना थापा थिए । कार्यक्रममा कक्षा ८, ९, र १० का विद्यार्थीले स्वागत नृत्य प्रस्तुत गरेका थिए । प्रअ फणिन्द्रप्रसाद अधिकारीले स्वागत मन्तव्य राखे ।
रजत जयन्तीकै अवसरमा यसअघि भएको कक्षा ११ र १२ विज्ञान र ब्यवस्थापन संकायका विद्यार्थीबीचको फुटसलका विजेता पुरस्कार प्रदान गरिएको खेलकुद संयोजक राजकुमार सिंहले बताए । सो अवसरमा कलाकार प्रकाश घिमिरेले मन्तव्य राखेका थिए ।

विद्यालय व्यवस्थापन समिति अध्यक्ष कमलराज सापकोटाको अध्यक्षतामा भएको कार्यक्रमको सञ्चालन कार्यक्रम संयोजक एवं सहप्राचार्य ज्ञानेश्वर सुवेदीले गरेका थिए ।

माउन्ट भ्याली कलेजका क्याम्पस प्रमुख नारायण न्यौपानेले बालबालिकाको लागि धेरै काम हुनुपर्ने बताए । विद्यालयले रजत जयन्तीकै अवसरमा यो वर्षभर नै सामाजिक, सांस्कृतिक एवं प्रतियोगितात्मक कार्यक्रम गरिरहेको सहप्राचार्य ज्ञानेश्वर सुवेदीले बताए ।