लेखनाथ । पोखरा ३२ लामेआहालस्थित राधाकृष्ण मन्दिर परिसरमा भदौ ३० गतेदेखि असोज ६ गतेसम्म श्रीमद्भागवत् महापुराण सप्ताह ज्ञानमहायज्ञ सञ्चालन हुने भएको छ । महायज्ञमा बिहान ६ बजेदेखि १० बजेसम्म पाठ पारायण, बिहान ११ बजेदेखि ५ बजेसम्म दैनिक भजनकीर्तनसहित कथावाचन हुने छ ।

वैदिक सनातन भागवत धर्म र संस्कृतिको संरक्षणार्थ भक्तिगोविन्द भागवत श्री अध्ययन प्रतिष्ठानको आयोजनामा महायज्ञ हुन लागेको हो । श्री ईश्वरकृष्ण महाराजले कथावाचन गर्ने बिहीबार आयोजित पत्रकार सम्मेलनमा जानकारी दिइएको थियो ।

प्रतिष्ठानका सल्लाहकार माधवशरण उपाध्यायले महायज्ञ आयोजना गर्नुुको मुख्य उद्देश्य आध्यात्मिक भावनाको जागरण ल्याउनु भएको बताउँदै भक्तजनलाई दान गर्न प्रेरित नगरिने बताएका छन् । तर स्वस्फूर्त रुपमा कसैले दान गर्न चाहेमा मन्दिरको नाउँमा उक्त दान रकम जम्मा हुने उनले बताए ।

प्रतिष्ठानका पीठाधीश मुकुन्दशरण उपाध्यायले पछिल्लो समयमा हिन्दु धर्मको अन्तर्यको विषयमा ज्ञाताहरूको समेत कमी देखिन लागेकाले यस विषयमा ज्ञान छर्नु कार्यक्रमको मुख्य उद्देश्य रहेको बताए । प्रतियोगितामा विभिन्न गुरुकुलहरुबाट १९ जनाभन्दा बढी सहभागिता रहनेछ ।

महायज्ञ सम्पन्न गर्नको लागि करिब १३ लाख खर्चको अनुमान गरिएकोमा प्रतिष्ठानका अध्यक्ष भक्ति अधिकारीले सहयोग गर्ने बताइएको छ । संस्कृत मावि तह गण्डकी प्रदेश स्तरीय भागवतवाचन प्रतियोगितासमेत हुने बताइएको छ ।