पोखरा । पोखरामा एकताका थुप्रै ब्यान्ड चलायमान थिए । जसका कालजयी गीत अझ पनि गुञ्जिरहन्छन् । तर समयक्रमसँगै ब्यान्डका सदस्यहरु लाखापाला लाग्दा पोखरेली ब्याड सुस्ताउँदै गयो । अझ कोरोनाले झनै पछाडि धकेल्यो ।

यसैक्रममा व्यान्डहरुलाई पुनजागृत गराउने उद्देश्यले इन्टरकलेज व्यान्ड कम्पिटिसन तयारी गरिएको छ । पोखरा सांगीतिक कलाकार संघको आगामी असोज १२ र १३ मा पोखराको नयाँबजारस्थित प्रदर्शनी केन्द्रमा उक्त प्रतियोगिता गर्न लागेको हो । जसका लागि असोज ३ सम्म फर्म भर्न सकिने समयसीमा रहेको हर्कराज गुरुङ (भाइ) ले बताए ।

प्रतियोगितामा देशभरका कलेजमा रहेका सांगीतिक व्याण्डहरुले प्रतिष्पर्धा गर्न पाउने अध्यक्ष गुरुङले बताए । प्रतिस्पर्धामा कक्षा ८ देखि स्नातकोत्तरसम्म पढ्ने विद्यार्थीको व्यान्डले भाग लिन सक्नेछ ।

फाराम भरेपछि डिजिटल अडिसन दिनुपर्नेछ । जसका लागि कलेज व्यान्डले ‘कभरसङ’ गाएर त्यसको भिडियो पठाउनुपर्नेछ । छनोट व्यान्डले पुन: फिजिकल अडिसन दिनेछन् ।

सेमिफाइनल राउन्डबाट फाइनलिस्ट चयन र विजेता घोषणा गरिने भएको छ । विजेताले १ लाख, उपविजेताले ५० हजार र तेस्रोले २५ हजारसहित प्रमाणपत्र प्राप्त गर्ने क्लब सचिव भाष्करध्वज श्रेष्ठले बताए । उत्कृष्ट भोकल, लिड गिटार, रिदम गिटार, बेस गिटार र उत्कृष्ट ड्रमरलाई जनही ५ हजारसहित प्रमाणपत्र दिइनेछ । प्रतियोगिताल विद्यार्थीमा लुकेर रहेको प्रतिभाको उजागर गर्नुका साथै विद्यालयमा सांगीतिक माहोल सिर्जना गर्ने वातावरण बनाउने श्रेष्ठको भनाइ छ ।