पोखरा । बुल्समेन क्लबको आयोजनामा चौंथो संस्करणको मिस्टर बुल्समेन शारीरिक सुगठन प्रतियोगिता असोज ५ र ६ मा ललितपुरमा हुने भएको छ । यसअघि ३ संस्करण पोखरामै भएकोमा चौथो संस्करण भने ललितपुरको सानेपामा आयोजना गर्ने निर्णय गरेको हो ।

मोफसलबाट आयोजना गरिएको शारीरिक सुगठन प्रतियोगिता सर्वाधिक पुरस्कार राशिको हो । क्लबले २०७१ देखि २ वर्षको अन्तरमा मिस्टर बुल्समेन शारीरिक सुगठन प्रतियोगिता गर्दै आएको छ ।

‘बुल्समेनको आह्वान युवाहरुको पहिचान’ भन्ने नारासहित स्थापित क्लबले शारीरिक सुगठन खेल मार्फत युवापुस्तलाई खेलकुलप्रति प्रेरित गरेको छ । स्वच्छ समाजको लागि स्वास्थ्य मानसिकतार व्यस्त मानसिकताको लागि स्वस्थ शरीर, स्वास्थ्य शरीरको लागि शारीरिक व्यायाम भन्ने मान्यतालाई क्लबले आत्मसात गर्दै आएको छ ।

क्लबले असोज ४ मा सहभागी खेलाडीको तौल लिने छ । पुरुषतर्फ ५५ केजी, ६० केजी, ६५ केजी, ७० केजी, ७५ केजी, ८० केजी र ८० केजीमाथिको तौल समूहमा प्रतिस्पर्धा हुने छ । असोज ५ मा प्रि–जजिङ र असोज ६ मा सानेपास्थित हेरिटेज गार्डेनमा फाइनल हुने क्लबले जनाएको छ ।

मेन्स फिजिकतर्फ १७० सेन्टिमिटर माथि र १७० सेन्टिमिटर मुनि प्रतिस्पर्धा गराइने क्लब उपाध्यक्ष रुपेन्द्र गुरुङले बताए । उनका अनुसार महिलाको इभेन्ट पनि समावेश गरिएको छ । महिलातर्फ वुमन्स फिजिक र वुमन वेलनेसमा प्रतिस्पर्धा गराइने छ ।

प्रतियोगिताको ओभरअल च्याम्पियनले ५ लाख नगद पुरस्कार प्राप्त गर्ने छ । प्रत्येक तौल समूहको विजेताले ३५ हजार, दोस्रोले २५ हजार र तेस्रोले २० हजार नगद पुरस्कार पाउने छन् । मेन्स फिजिकको दुवै इभेन्टका विजेताले १ लाख, उपविजेताले ५० हजार र तेस्रो स्थानमा रहने खेलाडीले ३५ हजार रुपैयाँ प्राप्त गर्ने छन् । त्यस्तै, वुमन फिजिक र वुमन वेलनेस विजेताले पनि समान १ लाख, ५० हजार र ३५ हजार पाउने छन् ।