पोखरा । नेपाली सेनाको पश्चिम पृतना हेडक्वाटरको जिम्मेवारी क्षेत्रबाट ६ सय ७५ जना सैन्य पास आउट भएका छन् । ३६ साताको सैन्य तालिम पूरा गरेका उनीहरुलाई सोमबार सपथ ग्रहण गराइयो ।

उनीहरुलाई पश्चिम पृतना हेडक्वार्टरअन्तर्गत ८ युनिटबाट सपथ गराइएको थियो । उनीहरुले गत वर्ष १ मंसिरदेखि तालिम सुरु गरेका थिए । ८ युनिटमध्ये सबैभन्दा बढी लमजुङको चण्डीप्रसाद गणबाट ९८ जना सैन्य पास भएका हुन् । जसमा रुरु भैरवदल गण तनहुँबाट ९७, भगवती दल गण फूलबारीबाट ९६, पश्चिम पृतना तालिम शिक्षालय खैरेनीटार र पश्चिम पृतना हेड क्वार्टर विजयपुरबाट ९३÷९३ जना पास भएका हुन् । यस्तै, कालीभञ्जन गण दमौलीबाट ६८, महावीर गण रेञ्जर पोखराबाट ६६ र रिपुमर्दन गण गोरखाबाट ६४ र चण्डिप्रसाद गण लमजुङबाट ९८ जना पास भए ।

पश्चिम पृतना हेड क्वार्टर विजयपुरमा भएको अन्तिम दलेल कवाजमा पश्चिम पृतनापति उपरथी दीपककुमार बानियाले उत्कृष्टलाई पुरस्कार वितरण गरेका थिए । उक्त युनिटको तालिममा सहभागी सैन्यलाई विधागत रुपमा उत्कृष्ट छनोट गरी पुरस्कार प्रदान गरिएको हो । तालिममा पर्वतका ईश्वर दर्जी सैद्धान्तिक तथा व्यावहारिक दुवैतर्फ सर्वोत्कृष्ट बने । तालिममा शारीरिक सहिष्णुता दौडतर्फ बादल गुरुङ, बाधा पारतर्फ नारायण विक, फायरिङतर्फ अशोक थापा, ड्रिलतर्फ विशाल अधिकारी उत्कृष्ट भए ।

नेपाली सेनाको सिपाही दर्जामा नियुक्त सबैलाई बधाई तथा शुभकामना व्यक्त गर्दै पृतनापति बानियाले भने, ‘राष्ट्रिय स्वतन्त्रता, स्वाधीनता, भौगोलिक अखण्डता र राष्ट्रिय एकताको संरक्षणका लागि प्रतिबद्ध नेपाली सेनाको मूलभूत दायित्वलाई मनन गरी आवश्यक परेको बेलामा राष्ट्र र जनताका लागि प्राणको आहुति दिनसमेत पछि नपर्ने प्रण गर्नु एक सैनिकको धर्म हो ।’

सीमित स्रोत र साधन बाबजुद नेपाली सेनाले आफ्ना सकल दर्जालाई उच्चस्तरीय तालिम प्रदान गर्दै आएको बताउँदै उनले आधारभूत तालिम सैनिक जीवनको सुरुआत भएको बताए । तालिमबाट शारीरिक, मानसिक र नैतिक साहस प्राप्त हुने बताउँदै उनले यसले आत्मविश्वासी एवं पेसाप्रति थप कटिबद्ध बनाउने बताए । सो अवसरमा तालिमप्राप्त सैन्य जवानले कवाज प्रदर्शन गरेका थिए ।