पोखरा । देवीरमण शर्मा ‘शास्त्री’ लाई शालीन, भद्र शिक्षासेवीरुपमा स्मरण गरिएको छ । बिहीबार उनको १०८ औं जन्मजयन्ती अवसरमा आयोजित स्मृतिग्रन्थ लोकार्पण समाारेहमा उनको चर्चा गरिएको हो ।

स्मृतिग्रन्थ लोकार्पण गर्दै संस्कृतिविद् जगमान् गुरुङले मेहनति शिक्षासेवीरुपमा स्व. शर्मालाई स्मरण गर्दै उनीबाट आफूले अनुशासनको पाठ सिकेको बताए । नेपाल प्रज्ञा प्रतिष्ठानका निवर्तमान कुलपति समेत रहेका गुरुङले शर्माको स्मृतिग्रन्थ प्रकाशन भएकोमा खुसी व्यक्त गर्दै जीवको सृष्टि नेपालको दामोदरकुण्डबाट भएको दाबी गरे । गुरुङले नेपाली जनता सधैँ स्वाधीन रहेको चर्चा गर्दै भारतको अधीनस्त हुन नसक्ने पनि औंल्याए ।

पृथ्वीनारायण क्याम्पसका संस्थापक जर्ज जोनले असल शिक्षाकर्मीरुपमा शर्मालाई स्मरण गर्दै उनीले क्याम्पसको संस्थापक प्राध्यापक भई २ वर्ष सेवा गरेको जानकारी दिए । साहित्यकार तारा पाखेले स्नेहपूर्वक पठनपाठन गराउने व्यक्तित्वका रुपमा शर्मालाई सम्झिए । सुवेदी कल्याण प्रतिष्ठान नेपालका कुलाधिपति देवीप्रसाद सुवेदीले शिक्षाको उज्यालो छर्ने कार्यमा शर्माको योगदान महत्वपूर्ण रहेको बताए ।

शर्माका पूर्व विद्यार्थी विश्व सिग्देलले आर्थिक अभावबीच जीउन आफूलाई शर्माले सिकाएको सम्झिए । विद्यार्थी खड्गबहादुर रानाभाटले उनीबाट आफूले राष्ट्रियता, अनुशासन, लननशीलता र स्वाभलम्बनको पाठ सिकेको स्पष्ट पारे ।

स्मृतिग्रन्थ समीक्षा गर्दै सहप्राडा यमनाथ तिमिल्सिनाले ग्रन्थ सत्यतथ्यमा आधारित रहेको दाबी गर्दै ग्रन्थमा कतिपय सामग्री भने दोहोरिएको जनाए ।

देवीरमण कृष्णकुमारी स्मृति प्रतिष्ठान अध्यक्षसमेत रहेका शर्माका सुपुत्र डा. अनिल सुवेदीले ग्रन्थ प्रकाशनका सहयोगी सबैप्रति आभार जनाए । कार्यक्रमबीच स्व. शर्माको जीवनीसँग सम्बन्धित वृत्तचित्र पनि प्रदर्शन गरियो ।

त्यस अवसरमा प्रतिष्ठान उपाध्यक्ष अखिल सुवेदी, सचिव पशुपति सुवेदी, सदस्य मनिष सापकोटाले पनि शर्माको व्यक्तित्वमाथि चर्चा गरे ।

कास्कीकोट निवासी सदाशिवका सन्तान देवीरमणले पोखरास्थित राष्ट्रिय मावि, अमरसिंह मावि, पृथ्वीनारायण क्याम्पस लगायतका दर्जनौं संघसंस्थामा सेवा गरेका थिए । पोखरामा जलवायु मापनको सुरुआत गराउनसमेत उनको भूमिका छ ।