पोखरा । अन्नपूर्ण गाउँपालिका वडा ५ स्थित शिवालय मन्दिरमा श्रीकृष्ण जन्माष्टमी पर्वको अवसर पारी अखण्ड हरिकीर्तन गरिने भएको छ ।

धार्मिक सहिष्णुता कायम गरी धर्मप्रतिको आस्थालाई निरन्तर सम्मान गर्दै नागरिकमा धार्मिक संस्कारको प्रत्याभूति गराउने उद्देश्यले झोवाङस्थित उक्त मन्दिरमा आगामी बुधबार तथा बिहीबार हरिकीर्तन गर्न लागिएको हो । सो अवसरमा कीर्तनसहित सामूहिकरुपमा जप गरिने मन्दिर व्यवस्थापन समिति अध्यक्ष प्रमोदकुमार पौडेलले बताए ।

विगत २५ वर्षदेखि रोकिएको कीर्तनलाई यस वर्षदेखि निरन्तरता दिन लागिएको हो । जसमार्फत लोप हुन लागेको त्यस गाउँको संस्कृतिको जर्गेना हुनुका साथै गाउँको धार्मिक तथा सांस्कृतिक पहिचान बढ्ने विश्वास छ । कीर्तनले सामिप्यता बढाउन विशेष भूमिका खेल्ने अपेक्षा पनि रहेको सचिव निर्मलकुमार पौडेलले जनाए ।