पोखरा । गण्डकी प्रदेश प्रशिक्षण प्रतिष्ठान (जिपिटिए) को आयोजनामा संघ, प्रदेश र स्थानीय तहमा कार्यरत निजामती कर्मचारीका लागि सेवाकालीन तालिम आइतबार सुरु भएको छ । प्रतिष्ठानले यसअघि पनि तालिम सञ्चालन गर्दै आए पनि यसपालि भने ठूलो संख्यामा कर्मचारीलाई एकैपटक तालिम दिन लागेको हो । सहायक र अधिकृतस्तरका गरी १ सय २० जना कर्मचारीका लागि ३० कार्यदिनको तालिम सुरु भएको हो ।

तालिमको उद्घाटन गण्डकी प्रदेशका मुख्यमन्त्री सुरेन्द्रराज पाण्डेले गरे । उनले सरकारको नेतृत्वमा को आउँछ, को जान्छ भन्ने विषय कर्मचारीका लागि गौंण भएको बताए । उनले पेसागत जिम्मेवारी र नागरिकप्रतिको उत्तरदायित्व वहनमा ध्यान केन्द्रित गर्न सुझाव दिए । कर्मचारीले दिने सेवा प्रवाहबाट आम नागरिकले सरकारको मूल्यांकन गर्ने भएकाले आफ्नो दक्षता, क्षमता बढाउन, छिटो छरितो सेवा दिने गरी तालिमको सदुपयोग गर्न सहभागी कर्मचारीहरुलाई मुख्यमन्त्री पाण्डेले निर्देशन दिए ।

सरकारी सेवाप्रति सर्वसाधारणको निराशा र गुनासोलाई विश्वास र आशा जगाउन राजनीतिक दल, सरकार, कर्मचारीको ठूलो भूमिका रहेको बताउँदै मुख्यमन्त्रीले सबैले आ–आफ्नो भूमिका जिम्मेवारीपूर्वक निर्वाह गर्नुपर्नेमा जोड दिए ।
कार्यक्रममा मुख्य न्यायाधिवक्ता चिरञ्जीवी शर्माले कर्मचारी प्रशासन जनमैत्री हुनुपर्ने भन्दै सेवाकालीन तालिम फलदायी हुने अपेक्षा गरे । नीति तथा योजना आयोगका उपाध्यक्ष डा. कृष्णचन्द्र देवकोटाले कर्मचारीतन्त्र समय सापेक्ष हुँदै जानुपर्नेमा जोड दिए ।

प्रमुख सचिव लक्ष्मीकुमारी बस्नेतले कर्मचारीहरुले यस तालिमलाई बढुवाको अवसरका लागि मात्र नभए कार्यदक्षता तथा क्षमता अभिवृद्धिका लागि महत्वपूर्ण छ भन्नेमा ध्यान दिन आग्रह गरिन् ।
कार्यक्रममा प्रतिष्ठानका कार्यकारी निर्देशक ऋषिराम पाण्डेले सहायक र अधिकृतस्तरका कर्मचारीका लागि थालेको ३० कार्यदिने तालिममा कार्यालय सञ्चालन तथा व्यवस्थापनका बारेमा शैद्धान्तिक व्याहारिक पक्षका विषयमा प्रशिक्षण दिइने जानकारी दिए ।

कर्मचारीको ज्येष्ठता, प्रदेश र स्थानीय तहमा समायोजन भएको मिति लगायत विषयलाई आधार मानी तयार पारिएको मापदण्ड अनुसार कर्मचारी छनोट गरिएको उनको भनाइ छ । यो तालिम लिएपछि कर्मचारीको बढुवाका लागि २ नम्बर थपिन्छ ।

तालिममा सहायकस्तरका ३० र अधिकृतस्तरका ९० कर्मचारी सहभागी छन् । सहायकस्तरका कर्मचारी संघीय कार्यालयका समेत रहेका र अधिकृतस्तरका भने प्रदेश र स्थानीय तहका मात्रै छन् । तालिमका लागि ५ सय ६२ जनाको आवदेन परेको थियो । प्रतिष्ठानले समयक्रमसँगै आफ्नो क्षमता समेत बढाउँदै लगेको भन्दै कार्यकारी निर्देशक पाण्डेले एकै दिनमा ४ समूहमा तालिम सञ्चालनका लागि दैनिक १६ जना प्रशिक्षक आवश्यक पर्ने बताए । उनले भने, सुविधासम्पन्न भवन निर्माण अन्तिम चरणमा पुगेको छ, प्रशिक्षण र अनुसन्धानमा प्रतिष्ठानलाई अब्बल सावित गर्ने हाम्रो प्रतिबद्धता छ ।’

कार्य सम्पादनमा आधारित प्रशिक्षण, समस्या केन्द्रित अनुसन्धान, सवाल केन्द्रित संवाद र ज्ञान व्यवस्थापन लगायतका काम प्रतिष्ठानले गर्दै आएको छ । प्रतिष्ठानले वर्षभरिमा प्रदेश र स्थानीय तहका कर्मचारी र जनप्रतिनिधिका लागि लामो र छोटो अवधिका गरी १ सय १६ वटा तालिम सञ्चालन गरेको छ । जसबाट ४ हजार २ सय ७ जना लाभान्वित भएको कार्यकारी निर्देशक पाण्डेले जानकारी गराए ।