पोखरा । पोखरा वडा ६ का वासिन्दाले महानगर प्रमुख धनराज आचार्यलाई पाँचबुँदे ज्ञापनपत्र बुझाएका छन् । भवनको अभिलेखीकरण गर्दा महानगरले नक्सा पाससरहको मान्यता दिन्छ कि दिंदैन भन्ने जिज्ञासा राख्दै वडावासीको तर्फबाट वडाध्यक्ष विष्णुबहादुर भट्टराईको हस्ताक्षरसहित ज्ञापनपत्र बुझाइएको होटल संघ पोखरा नेपालका अध्यक्ष लक्ष्मण सुवेदीले बताए ।

वडाध्यक्ष भट्टराईसहित विभिन्न दलका प्रतिनिधि, होटल संघ र नागरिक समाजसहितका वडावासीको तर्फबाट बुझाइएको ज्ञापनपत्रमा भवन अभिलेखिकरणका विषयमा मुख्य ३ जिज्ञासा राखिएको छ । जसमा पहिलो हो, महानगर पालिकाले अभिलेखीकरणको मात्र प्रमाणपत्र दिन्छ कि सम्पन्नताको पनि प्रमाणपत्र ?

दोस्रो हो, यस्तो प्रमाणपत्रलाई अन्य सबै निकायहरु खास गरी धितो मूल्यांकनकर्ता संस्थाहरु र बैंक वित्तीय संस्थाले सम्पनता प्रमाण पत्रसरह मान्यता दिन्छन् कि दिँदैनन् ? र, तेस्रो हो, अभिलेखिकरण गर्दा लाग्ने तीन गुना राजस्वलाई कुनै समितिको सिफारिस वा कुनै तरिकाबाट घटाउन सकिन्छ कि ?

उनीहरुले तीसौं वर्षदेखि पोखरामा स्वीकृत भवन निर्माण नक्साको उचाइ एक थरी तर निर्माण भएको भवन अर्कै थरी हुने गरेको तर जिम्मेवार निकायबाट समयसापेक्ष उचाइको मापदण्ड परिवर्तन नगरेको अवस्था पनि स्मरण गराएका छन् । यस वर्ष ७ प्रतिशत बहाल कर लगाउँदा मर्का पर्न गएको वडावासीले गुनासो गरेका छन् । फिस्टेल गेटदेखि खहरेचोकसम्म समान बहाल दर अनुमान गरी वर्ग फिटको आधारमा कर लगाउँदा जनतालाई मर्का पर्न गएको कुरा पनि ज्ञापनपत्रमा उल्लेख छ ।

केही कन्सल्टेन्सीको फाइदाका लागि उनीहरुकै दबाबमा विभिन्न तहका होटल, लज, रेस्टुराँ बारले पर्यटक स्तरमा दर्ता तथा नवीकरण गर्न विगतमा हुँदै नभएको वातावणीय अध्ययन प्रतिवेदन पेस गर्नुपर्ने प्रावधान लागु गरिएको भन्दै गुनासो गरिएको छ । प्रदेश सरकारबाट इजाजतप्राप्त हुने होटल, लज, रेस्टुराँ बारले संक्षिप्त वातावरणीय अध्ययन तथा प्रारम्भिक वातावरण परीक्षण मूल्यांकन पेस गर्नुपर्ने प्रावधान राखिएको छ । यो लागु भए पोखरामा भएकामध्ये ९० प्रतिशत व्यवसायको नवीकरण हुन नसक्ने अवस्था रहेको होटल संघ अध्यक्ष सुवेदीले बताए ।

घरजग्गाको वास्तविक मूल्य घटिरहेको र चरम मन्दी अवस्थामा पनि प्रदेश सरकारले जमिनको सरकारी मूल्यांकनमा भारी वृद्धि गरेपछि परेको प्रभाव न्यूनीकरण गर्न तथा अंशबन्डा तथा नामसारी दस्तुर शुल्क घटाउन महानगरसँग अनुरोध गरिएको छ ।