पोखरा । पोखरा–१३ कुँडहरस्थित बेसलाइन एकेडेमी स्कुलका कक्षा ७ का विद्यार्थीले वृद्धाश्रममा सहयोग गरेका छन् । कक्षा ७ का ३८ जना विद्यार्थीले पोखरा–२७ सँहेलापाखास्थित वृद्धा तथा बालाश्रममा खाद्यान्न तथा स्टेसनरी सामान सहयोग गरेका हुन् ।

श्रीकृष्ण प्रणामी मन्दिर सहेलापारखामा एक कार्यक्रमबीच ९ जना वृद्धवृद्धा तथा ८ जना अनाथ बालबालिकाहरूलाई फूल प्रसादले सम्मान गरि झण्डै ३८ हजार बराबरको खाद्यान्न, फलपूmल तथा स्टेसनरी सामग्री सो आश्रमका संरक्षक कल्याणकुमार कार्कीलाई हस्तान्तरण गरिएको थियो ।

कार्यक्रमको संयोजन तथा सञ्चालन गरेका रामप्रसाद तिमिल्सेनाका अनुसार आश्रमतर्फबाट संरक्षक कार्की, सचिव तिलकशाली अधिकारी तथा विद्यालयका तर्फबाट निर्देशक शोभालक्ष्मी गौतमले मानवीय सेवाको आवश्यकतामाथि चर्चा गरे । अनाथ बालबालिकाले गीत तथा नृत्य प्रस्तुत गरेका थिए । विद्यार्थीका तर्फबाट स्वर्णिम गुरुङ र उज्ज्वल गुरूङले सहयोगका हात दिन पाउदा अत्यन्त खुसी लागेको बताए ।