पोखरा । रुपा गाउँपालिका ७ स्थित रामकोट नमुना माविमा वृक्षरोपण गरिएको छ । विद्यालयमा सञ्चालित बालीविज्ञानअन्तर्गत दोस्रो र तेस्रो वर्षमा अध्ययनरत विद्यार्थी र शिक्षकको सहभागितामा वृक्षरोपण गरिएको हो ।

विद्यालयको करिब २० रोपनीमध्ये केही भागमा मंगलबार एभोकाडो, नेवारो लगायत फलफूल तथा घाँस प्रजातिका बिरुवा रोपिएको छ । जलाधार संरक्षण कार्यालय पोखराले बिरुवा उपलब्ध गराएको थियो । विद्यार्थीले प्राप्त गरेको सैद्धान्तिक ज्ञानलाई व्यावहारिक र उत्पादनमूलक बनाउन विद्यार्थीको सहभागितामा कार्यक्रम गरिएको विद्यालयका प्रधानाध्यापक विष्णुप्रसाद न्यौपानेले बताए ।

विद्यालय व्यवस्थापन समिति अध्यक्ष नारायणकुमार श्रेष्ठले बिरुवा उपलब्ध गराउने जलाधार संरक्षण कार्यालय पोखराप्रति हार्दिक आभार प्रकट गर्दै यस्ता उत्पादनमूलक कार्यक्रमलाई निरन्तरता दिने बताए ।

यस्तै, विद्यालयको शैक्षिक गुणस्तर सुधारको लागि अभिभावकसँग शिक्षक कार्यक्रम मंगलबारबाटै सुरु भएको छ । शिक्षकहरू विभिन्न समूह विभाजन गरी विद्यार्थीको घरघरमै पुगी अभिभावकसँग अन्तक्र्रिया तथा परामर्श थालिएको विद्यालयका शिक्षक राजु रिजालले जानकारी दिए । प्रत्येक विद्यार्थीको घरघरमा जाने र अभिभावकसँग परामर्श गरी अघि बढ्दा अभिभावक र विद्यालयको सम्बन्ध सुदृढ हुनुका साथै शैक्षिक गुणस्तर सुधारमा योजना बनाउन सहज हुने प्रअ न्यौपानेले सुनाए ।