पाेखरा । जानकी मावि, महतगौडाका विद्यार्थी स्कुल पोषाक पाउँदा हर्षित भएका छन् ।

लायन्स क्लब अफ पोखरा बिरौटा साझा चौतारीले विद्यालयका २४ जना समाजका विपन्न एवं असहाय विद्यार्थीलाई पोषाक वितरण गरेको क्लबका तृतीय उपाध्यक्ष एवं कार्यक्रम संयोजक सीता काफ्ले भण्डारीले बताइन् । ‘साथीहरु विद्यालय पोषाकमा आएको टुलुटुलु हेर्न बाध्य उनीहरु पोषाककै अभावमा कतिपय शैक्षिक एवं अतिरिक्त कृयाकलापमा समेत सहभागि बन्नबाट वञ्चित थिए,’ उनले भनिन्, ‘उनीहरुको मनोवल उच्च बनाउन संस्थामा आवद्ध सदस्यबाट संकलित ३१ हजार बराबरको टिसर्ट र ट्रयाक सुट वितरण गरिएको हो ।’

कार्यक्रममा लायन्स डिस्ट्रिक चियरपर्सन विष्णुप्रसाद सुवेदीले शैक्षिक गुणस्तरका लागि शिक्षक, अभिभावक र विद्यार्थीको त्रिकोणात्मक प्रयासको खाँचौ औंल्याए ।

क्लब अध्यक्ष लक्ष्मी बराल आचार्यको अध्यक्षतामा भएको कार्यक्रममा पोखरा १७ वडा सदस्य शिवराम भण्डारी, लायन्न सिजन चियरप्रसन भोजराज बराल, विद्यालय प्रअ अर्जुन कँडेल, सदाशिव सिद्धेश्वर हरिहर मन्दिर व्यवस्थापन समिति अध्यक्ष नगेन्द्र शर्मा भण्डारी, गीता पराजुली, क्लब सचिव अमृता अधिकारी लगायतले शिक्षाको महत्व र आवश्यकता माथि चर्चा गरे ।