लेखनाथ । नागरिक परोपकार समन्वय संस्था पोखरा–३० को चौंथो वार्षिक साधारण सभा शुक्रबार भएको छ ।

सभाको उद्घाटन गर्दै पोखरा महानगरपालिकाका प्रमुख मेयर धनराज आचार्यले विपत् व्यवस्थापनका कार्यहरूमा संस्थाले गर्दै आएका कार्यहरूको प्रशंसा गरे । उनले आगामी दिनमा महानगरको विपद् व्यवस्थापन समितिसँग सहकार्य गर्दै अगाडि बढ्नुपर्ने आवश्यकता औंल्याए । विपद्का घटनाहरूबाट क्षति हुनै नदिनेतर्फ सबैजना सचेत हुनुपर्ने र पूर्वतयारीका गतिविधिलाई पनि सहकार्यका माध्यमबाट अघि बढाउन उनले सुझाव दिए ।

मेयर आचार्यले विश्व बैंकको आर्थिक सहयोगमा पोखरा–२६ अर्घौंदेखि शिशुवा, खुदी हुँदै गगनगौंडा जोडिने सडक मार्ग निर्माणको लागि योजना छनोट भएको र यसलाई सफल बनाउन सम्पूर्ण स्थानीयले सहयोग गर्नुपर्ने बताएका थिए ।

मेयर आचार्यले संस्थाको नवनिर्मित भवन उद्घाटन गरे । करिब ३० लाखको लागतमा निर्माण सम्पन्न भएको ५ कोठे भवनमा संस्थाको कार्यालय, सभाहल, विपद व्यवस्थापनका सामग्रीहरूको स्टोर रहेका छन् ।

रुपा गाउँपालिकाका अध्यक्ष नवराज ओझाले नागरिक परोपकार समन्वय संस्था रुपा गाउँपालिकाको पनि सहयात्री संस्था भएको र आफूहरूले पनि संस्थाको सेवाबाट लाभ लिन पाएको बताए । उनले गाउँपालिकाले व्यवसायीहरूका लागि व्यवसायमैत्री नीति ल्याएको बताउँदै रुपा गाउँपालिकालाई व्यवसायको हब बनाउन सकिने पनि बताएका थिए ।

कार्यक्रममा पोखरा–३० का अध्यक्ष एवं संस्थाका संरक्षक दुर्गाप्रसाद सुवेदी, नेपाल उद्योग वाणिज्य महासंघका केन्द्रीय सदस्य बाबुराम गिरी, लेखनाथ उद्योग वाणिज्य संघका अध्यक्ष छत्रधर आत्रेय, संस्थापक संरक्षक श्रीराम पोखरेल, संस्थापक अध्यक्ष राजेन्द्र ओझा, पोखरा महानगर कार्यपालिका सदस्य भीमकुमारी पुन लगायतले बोलेका थिए ।

संस्थाका अध्यक्ष चिरञ्जीवी तिवारीको अध्यक्षतामा भएको कार्यक्रम सचिव गीता जमरकटृेलले सञ्चालन र उपाध्यक्ष देवराज पन्थीले धन्यवाद गरेका थिए ।