पोखर। गण्डकी प्रदेश सभामा प्रमुख प्रतिपक्षी दल नेकपा एमाले संसदीय दलका नेता खगराज अधिकारीले त्रिवेणी–कोरोला सडक निर्माणलाई सरकारले प्राथमिकतामा राख्नुपर्ने बताएका छन् । गण्डकी प्रदेश सभामा मंगलबार विशेष समय लिएर नेता अधिकारीले बाटो खोल्न र संरचना बनाउका लागि आफ्नो श्रमदान गर्न तयार रहेको भनाइ राखे ।

उनले भने, ‘गजेन्द्रमोक्षधामदेखि कोरोलासम्म हामी आफैले हाम्रो प्रदेशबाट जान सकेनौं भने प्रदेशको औचित्यमाथि प्रश्नचिह्न खडा हुन्छ, त्यहाँ संरचना बनाउने काम र बाटो खोल्ने काममा ध्यान दिनुपर्दछ । होइन भने प्रतिपक्ष तपाईं भन्नुस् श्रमदान दिएर त्यो सम्पूर्ण काम प्रतिपक्षको अगुवाईमा हामी गर्न तयार छौं सरकार तयार छ कि छैन ?’ उनले सरकारले श्रमदान र श्रम शिविरको आह्वान गरेमा कार्यकर्ता खटाउने उद्घोष गरे ।

कोरोला नाकामा सीमा सुरक्षा कार्यालय खोल्न पर्न सरकार तत्पर हुनुपर्ने उनको भनाइ थियो । सीमाभन्दा १४ किलोमिटर तल बिओपी राखेर हुँदैन भन्दै त्यसका लागि रकम अपुग भए आफू १ महिनाको तलब दिन तयार रहेको बताए । नेता अधिकारीले कागबेनी लगायत ११ वटै जिल्लामा बाढी पहिरोले पु¥याएको क्षतिप्रति सरकारको ध्यानाकर्षण गराउँदै तत्काल राहतको प्रबन्ध गर्न अनुरोध गरे । प्रदेश र मुलुकभर लम्कीस्किनको महामारी फैलिएको भन्दै उनले पशुं संकट घोषणा गर्न सुझाव दिए ।

पूर्व मुख्यमन्त्री समेत रहेका मुख्यमन्त्री अधिकारीले आफ्नो सरकारले थालेका काम पछ्याएर सय दिनको उपलब्धिमा राखेको भन्दै कटाक्ष गरे । विकास निर्माणको कामलाई ध्यान नदिएर खगराजका पालामा नियुक्त भएका ५ कर्मचारीलाई हटाउने ध्याउन्नमा भौतिक मन्त्रालय लागेको उनको भनाइ थियो ।
गण्डकी विश्वविद्यालयको बजेट कटौतीदेखि प्रज्ञा प्रतिष्ठान, जिपास्ट, जिआइटीलाई कमजोर बनाएर सरकार कहाँ पुग्ने खोजेको भन्दै उनले प्रश्न गरे । अधिकारले अहिले आँखा पाक्ने रोग फैलिरहेको बेला सरसफाइमा विषेश ध्यान दिन आग्रह गरे ।