पोखरा । एसियाली विकास बैंकको आर्थिक सहयोगमा विस्तार भइरहेको मुग्लिन–पोखरा सडक सुधार आयोजनाको काममा भएको ढिलासुस्तीप्रति पोखरा पर्यटन परिषद्ले सरोकारवालाको ध्यानाकर्षण गराएको छ । परिषदका अध्यक्ष पोमनारायण श्रेष्ठ नेतृत्वको टोलीले आइबार स्थलगत अनुमगन गरी दमौलीमा छलफल समेत गरेको छ ।

परिषदले नेपालका दुई ठूला सहर काठमाडौं र पोखरा जोड्ने पृथ्वी राजमार्ग अन्तर्गतको उक्त खण्डलाई कम्तीमा चार लेनको बनाउने कार्य निकै महत्वपूर्ण र सराहनीय रहे पनि काममा ढिलासुस्ती हुँदा व्यवसाय नै प्रभावित भएको जनाएको छ । बाटो विस्तार हुनु समग्र पर्यटन क्षेत्रका लागि यो हर्षको भएको भन्दै सडक विस्तार कार्यको प्रशंसा गरेको परिषदले भनेको छ, ‘तर जुन गति र स्तरमा यो सडक विस्तार कार्य अगाडि बढेको छ, त्यसले आम उपभोक्ता, निजी क्षेत्र र पर्यटन जगतमा थुप्रै गुनासोहरु उब्जाएको छ ।’
सडक विस्तार कार्य अगाडि बढ्नु सकारात्मक पक्ष हुँदाहुँदै पनि निर्माण पक्षबाट भएको सुस्त र अव्यवस्थित विस्तारकार्यबाट सेवाग्राहीले थुप्रै कठिनाई र झन्झट भोग्दै आउनु परेको परिषद अध्यक्ष श्रेष्ठ बताउँछन् ।

छोटो दुरीको यात्राका लागि लामो समय खर्चनुपर्ने, दिक्क लाग्दो र कष्टपूर्ण यात्रा, विरामी र दिवस यात्रा अशक्त यात्रुका लागि थप जोखिम तथा हैरानीको अवस्था सिर्जना हुन पुगेको छ । यतिमात्र नभई ढिलो गतिमा काम अगाडि बढ्दा लामो समयसम्म सडक वरपरका वासिन्दाले धुलो, धुँवा र ध्वनि प्रदूषणको समस्याबाट गुज्रदै स्वास्थ्य जोखिमको सामाना गर्नु पर्ने अवस्था सिर्जना भएको छ ।

नेपाली अर्थतन्त्रको महत्वपूर्ण आधार मानिएको पर्यटन र उद्योग वाणिज्य क्षेत्रले समेत सुस्त र अव्यवस्थित निर्माण कार्यबाट प्रत्यक्ष प्रभावित हुनु परेको परिषदले जारीगरेको विज्ञप्तिमा उल्लेख छ । काठमाडौं वा नारायणगढ हुँदै पोखरासम्म यात्रा गर्न चाहने पर्यटकले सिंगो दिन खर्चनुपर्ने अवस्था सिर्जना भएको छ । काठमाडौं–पोखराबीचको ५ देखि ६ घन्टा लामो बसयात्राका लागि अहिले १२ घन्टासम्म लाग्ने गरेको छ । विज्ञप्तिमा भनिएको छ, ‘यसबाट पोखरा र वरपरको पर्यटनमा नकारात्मक प्रभाव परेको छ । निजी क्षेत्रले बिक्रीयोग्य वस्तु, अन्य उत्पादन र कच्चा पदार्थ ढुवानीमा लामो समय खर्चनु परेको छ । भूकम्प र नाकाबन्दीपछि कोभिड – १९ को मार खेपेको पर्यटन र उद्योग वाणिज्य क्षेत्रका लागि पहुँचमार्गको यो अवरोध अर्को अभिसाप बन्न पुगेको छ ।’

सम्भव भएका ठाउँमा वैकल्पिक मार्ग र डाइभर्सनहरुको व्यवस्था गरी यात्रालाई सहज र छिटो बनाउन सके झनै उत्तम हुने थियो

खबौं रुपैयाँको लगानी रहेको पोखरा क्षेत्रको पर्यटनका लागि यो सुखद पक्ष होइन भन्छन् परिषद अध्यक्ष श्रेष्ठ । उनका अनुसार औपचारिक रुपमै नेपालको पर्यटकीय राजधानी घोषणा हुन लागेको पोखराका लागि त यो झनै नकारात्मक अवस्था हो । सडक विस्तार कार्य सुरु भएको यतिका समय गुनँदा पनि निकै कम प्रतिशत मात्र प्रगति हुनु निरासजनक र दुःखद पक्ष हो ।

यो विषयमा परिषद्ले विगतमा प्रधानमन्त्री, अर्थमन्त्री, भौतिक पूर्वाधार तथा यातायात मन्त्री, पर्यटन मन्त्री, गण्डकी प्रदेश सरकारका प्रमुख तथा मुख्यमन्त्री र मन्त्रीहरुको ध्यानाकर्षण गराइसकेको अध्यक्ष श्रेष्ठले बताए ।

उनले मुग्लिन पोखरा सडक खण्डको विस्तार र स्तरोन्नति कार्यलाई तिव्रता प्रदान गरी समयमै काम सम्पन्न होस् भन्ने मुख्य माग र चासो रहेको बताए । सडक विस्तारको शैलीलाई परिवर्तन गरी सडकको एक किनारतर्फ काम गर्ने र अर्कोतर्फबाट सवारीसाधनको सहज आवतजावतको वातावरण सिर्जना गर्न सके सेवाग्राहीलाई सहज वातावरण सिर्जना हुने परिषदको सुझाव छ ।

‘विभिन्न सिफ्टमा काम गर्ने गरी राति र दिनमा उत्तिकै शीघ्र गतिमा काम अगाडि बढाउन जरुरी रहेको हामीले अवलोकनका क्रममा महसुस ग¥यौं, सम्भव भएका ठाउँमा वैकल्पिक मार्ग र डाइभर्सनहरुको व्यवस्था गरी यात्रालाई सहज र छिटो बनाउन सके झनै उत्तम हुने थियो,’ परिषदले भनेको छ ।

सडक विस्तार कार्यबाट विविध जगतमा निकै नै कठिनाई उत्पन्न भएको पुनः स्मरण गराउँदै परिषदले सडक विस्तार कार्यलाई व्यवस्थित र तीव्र रुपमा अगाडि बढाउन सरकार, निर्माण पक्ष र सम्बन्धित निकायको ध्यानाकर्षण गराएको जनाएको छ ।