पोखरा । नेकपा एमालेले गण्डकी प्रदेशसभा सचिवालयमा २ वटा जरुरी सार्वजनिक महत्वको प्रश्ताव दर्ता गरेको छ । पोखरा अन्तर्राष्ट्रिय विमानस्थलबाट अन्तर्राष्ट्रिय उडानको व्यवस्था गर्न र पछिल्लो समय पशु चौपायमा फैलिएको लम्पी स्किन रोगबाट पीडित किसानलाई क्षतिपुर्ति तथा बिमा कम्पनीले दिनुपर्ने रकम दिलाइदिन मागसहित प्रस्ताव दर्ता गरेको हो । ‘भारत हुँदै उडान बाहिरिने ५ वटा रुट खुला भए पनि भित्रिन सिमराको रुट मात्रै खुला छ ।

प्रधानमन्त्रीको तहबाट पश्चिमको रुट समेत खुला गर्नेगरी छलफल गर्नुपर्छ,’ प्रस्तावक देवका पहारी भन्छिन्, ‘पोखराबाट नियमित उडान नभए कर्जा तिर्न समस्या हुन्छ । कतार, भुटान लगायत देशले उडान भर्न चाहना राखेर पनि सरकारले अनुमति नदिएको समाचार बाहिरिएको छ । विभिन्न गन्तब्यसँग यथाशीघ्र सम्झौता गर्न हाम्रो माग हो ।’ उनको प्रश्तावमा सांसदहरु यशोदा रिमाल र कृष्णप्रसाद पाठकले समर्थन गरेका छन् ।

यस्तै, सांसद भीम कार्कीको प्रश्तावमा लम्पी स्किन रोगको निदानबारे अर्को जरुरी सार्वजनिक महत्वको प्रश्ताव दर्ता भएको छ । गण्डकीमा हालसम्म ८५ मध्ये ८२ पालिकामा यो रोग फैलिएको छ । प्रदेशका ८ लाख ५४ हजार पशुबस्तु मध्ये हालसम्म १२ प्रतिशतलाई मात्रै खोप लगाइएकोले धेरै क्षति हुन सक्ने संकेत सहित सरकारको ध्यानाकर्षण गराएको कार्कीले बताए । केन्द्रबाट ५१ हजार ४ सय, किसानले ५ हजार १ सय, स्थानीय तहले ४६ हजार ७ सय पशुमा मात्रै खोप पुगेको छ ।

‘बिमा गरिएका पशु चौपायाको मृत्यु भएपछि बिमा कम्पनीले रकम दिन मानेका छैनन् । ढिलासुस्ती र आनाकानी गरेका छन्,’ उनले भने, ‘रोग फैलिँदै गएकोले रोकथामका लागि प्रदेश सरकारको भूमिका प्रभावकारी हुनुपर्छ । किसानलाई क्षतिपूर्ति र राहतको व्यवस्था गर्न जोडदार माग गर्दछौं ।’ उक्त प्रस्तावमा एमालेकी सांसद राजकुमारी भुजेल र राप्रपा सांसद विन्दु पौडेलले समर्थन गरेका छन् ।