पोखरा । नेपाल खेलकुद पत्रकार मञ्च गण्डकीले आगामी मंगलबार स्थापना दिवस मनाउने भएको छ । २०७५ साउन २३ मा जिल्ला प्रशासन कार्यालय कास्कीमा मञ्च दर्ता भएको दिनलाई स्थापना दिवस रुपमा मनाउन लागिएको हो ।

मञ्चको शनिबार ३० औं कार्यसमिति बैठकले कालावाङ घरेडी होमस्टेमा ‘सातौं पोखरा स्पोर्टस् अवार्डको को समीक्षा’ सहित दिवस मनाउने निर्णय गरेको हो । होमस्टे अवसरमा अवार्डको समीक्षासहित विविध कार्यक्रम गरिने निर्णय भएको मञ्च अध्यक्ष दीननाथ बरालले जानकारी दिए ।

गत २३ वैशाखमा पोखरा सभागृहमा मञ्चले स्पोर्टस् अवार्ड सफलतापूर्वक सम्पन्न गरेको थियो । जसमा ७ विधामा अवार्ड वितरण गरिएको थियो ।

२०५७ सालमा रामकृष्ण ज्ञवालीको अध्यक्षतामा राजधानीबाहिर पहिलोपटक नेपाल खेलकुद पत्रकार मञ्च कास्की समन्वय समिति गठन भएको थियो । संघीय व्यवस्थासँगै मञ्च स्वायत्तताको लागि प्रदेशस्तरमा कार्यक्षेत्र रहने गरी विधिवत दर्ता भएको थियो । केशव पाठकको अध्यक्षतामा ११ सदस्यीय तदर्थ समितिले विधान मस्यौदा समिति तथा संस्था दर्ताका लागि संयोजक विजय नेपाल रहेको समिति गठन गरेको थियो । केशव पाठक र रञ्जन अधिकारी सदस्य रहेको समितिले संस्था विधिवत दर्ता (दर्ता नं ३९५४) गरेको हो । खेलकुद बिटमा कलम चलाउने पत्रकारहरु संगठित मञ्चमा हाल ७४ सदस्य रहेको मञ्च महासचिव राजाराम पौडेलले बताए ।