पोखरा । पोखरा महानगरपालिकाले नेपाल सहरी शासन र पूर्वाधार परियोजना (एनयुजिआइपी) अन्तर्गत थप २ वटा परियोजना छनोट गरेको छ । वल्र्ड बैैंकको सहयोगमा सम्पन्न गर्ने गरी बिरौटा–पुडिँटार र लेखनाथचोक–डाँडाकोनाक–शिशुवा–खुदीखोला–गगनगौंडा सडक स्तरोन्नतिका लागि परियोजना छनोट गरेको हो ।

साउन १४ गते बसेको कार्यपालिका बैठकले सन् २०२६ मार्च ५ भित्र सम्पन्न गर्ने गरी थप दुई वटा परियोजनाहरू छनोट गरिएको प्रमुख धनराज आचार्यले बताए । ‘वल्र्ड बैंकको सहयोगमा हाल तालचोक–बेगनास सडक स्तरोन्नतिको काम भइरहेको छ,’ प्रमुख आचार्यले भने, ‘यसबाहेक थप २ वटा महत्वपूर्ण परियोजनाहरू छनोट गरेका छौं । यी सबै परियोजना साढे २ वर्षभित्र सम्पन्न गर्नुपर्ने समयावधि तोकिएको छ ।’ प्रमुख आचार्यका अनुसार यी परियोजना सम्पन्न पश्चात् नमुना सडक बन्नेछन् ।

यी सबै परियोजनाहरूमा वल्र्ड बैंकले २५.६८ मिलियन अमेरिकी डलर (३ अर्ब ३७ करोड ९३ लाख १० हजार ८ सय ८रुपैयाँ) लगानी गर्नेछ । निर्माणाधीन तालचोक–बेगनास सडकमा ७५ करोड ४८ लाख ६७ हजार ८ सय ७३ रुपैयाँ, बिरौटा–पुडिटार सडक १.५ अर्ब र लेखनाथचोक–डाँडाकोनाक–शिशुवा–खुदीखोला–गगनगौंडा सडक १ अर्ब लागतमा स्तरोन्नति हुनेछ । तालचोक–बेगनास सडक स्वच्छन्द–सपना–वल्र्डवाइड जेभी काठमाडौंले निर्माणको ठेक्का पाएको छ ।

अन्य २ वटा परियोजना सर्वेका लागि वल्र्ड बैंकको प्राविधिक टोली खटिने तयारीमा रहेको छ । ५ वर्षभित्र सम्पन्न गर्ने गरी सन् २०२१ मार्च ५ मा सम्झौता भएको थियो ।