पोेखरा । नेपाल विद्युत प्राधिकरणको ३८ औं वार्षिकोत्सवमा प्राधिकरणका कार्यालय तथा अन्य हाताभित्र वृक्षरोपण गरिएको छ । सेती पावरहाउसबाट सुरु गरिएको वृक्षरोपण गण्डकी प्रदेशका १३ वटै वितरण तथा उत्पादन केन्द्रमा विभिन्न जातका ३ सय बोटबिरुवा वृक्षरोपण गरिएको नेपाल विद्युत प्राधिकरण गण्डकी प्रादेशिक कार्यालयका प्रशासन अधिकृत भोलानाथ शर्माले बताए । उनका अनुसार कल्की, निम, धुपी, अमला, बर्रो लगायत औषधीजन्य बोटबिरुवा रोपिएको थियो ।

नेपाल विद्युत प्राधिकरण गण्डकी प्रादेशिक कार्यालयका प्रादेशिक प्रमुख जगदीशचन्द्र जोशीले विश्वमा जलवायु परिवर्तनका कारण ठूलो चुनौती आइरहेको बेला वातावरणीय सन्तुलनका लागि जनचेतना अभिवृद्धि गर्न केन्द्रदेखि नै सो अभियान थालिएको बताए ।

पोखरा केन्द्रका प्रमुख राजीव सिंहले लाइन बिस्तारको क्रममा बोटबिरुवा काट्नुपर्ने बाध्यता रहेको अवस्थामा प्राधिकरणले रुख काट्न मात्र होइन, रुख रोप्ने पनि गरेको छ भन्ने सन्देश दिएको तर्क गरे ।

कार्यक्रममा प्राधिकरणका गण्डकी प्रदेश, पोखरा वितरण केन्द्र, सेती जलविद्युत आयोजना र कुँडहरलगायत कार्यालय प्रमुख तथा कर्मचारीको सहभागिता थियो ।