पोखरा । लायन्स क्लब अफ पोखरा फेवा फूलबारीले पोखराको घार्मीमा वृक्षरोपण गरेको छ ।

ओमकारेश्वर महादेव मन्दिर परिसरमा क्लबले तेजपत्ता, पारिजात, गुलमोहर, आकाशे फल, एभोक्याडोलगायतका विभिन्न प्रजातिका ५० भन्दा बढी बिरूवा रोपेको कार्यक्रम संयोजक गोविन्दराज अधिकारीले बताए । लायन्स पार्ककै रूपमा विकास गरिएको उक्त क्षेत्रमा यसअघि रोपिएका बिरूवासमेत संरक्षणको लागि गोडमेल गरिएको थियो ।

लायन्स क्लब अफ डिस्ट्रिक्ट ३२५ केका चिफ एडभाइजर प्रजापति बास्तोलाले ओमकारेश्वर महादेव मन्दिर व्यवस्थापन समिति अध्यक्ष ढुण्डिराज पौडेल र कार्यक्रम संयोजक गोविन्दराज अधिकारीलाई बिरूवा हस्तान्तरण गरी उद्घाटन गरे । बास्तोलाले लायन्सले विगतदेखि नै वातावरण संरक्षणमा महत्वपूर्ण भूमिका खेलेकोमा प्रशंसा गर्दै बिरूवा रोपेरमात्र नभई यसको दिगो संरक्षणमा ध्यान दिन आग्रह गरे ।

क्लब अध्यक्ष माधव कँडेलको अध्यक्षतामा भएको कार्यक्रममा शंकरबहादुर खत्री, कार्यक्रम संयोजक गोविन्दराज अधिकारी, पत्रकार शिशिर पौडेल, मन्दिर व्यवस्थापन समिति अध्यक्ष ढुण्डिराज पौडेल, समाजसेवी लीला अधिकारी पौडेल, पूर्व अध्यक्ष सञ्जय बस्नेत, गुरूप्रसाद पौडेल, पण्डित गुरूदत्त लामिछाने, क्याबिनेट सेक्रेटरी कुन्दनराज शर्मालगायतले बोलेका थिए ।

मन्दिर व्यवस्थापन समिति अध्यक्ष पौडेलले मन्दिर क्षेत्रलाई तारबार गरी सुरक्षित बनाउन सके बोटबिरुवा संरक्षण हुने बताउँदै त्यसमा सहयोग गर्न आग्रह गरे । क्याबिनेट सेक्रेटरी कुन्दनराज शर्माले स्वागत मन्तव्य व्यक्त गरेको कार्यक्रममको सञ्चालन क्लब सचिव इ. दीपक केसीले गरेका थिए ।