पोखरा  । यस वर्षको ताया मचा प्रतियोगिता भदौ १६ गते रानीपौवामा हुने भएको छ ।

पोखराका सबै नेवार सुमुदायअन्तर्गतका टोलटोलका संस्थाले प्रतियोगितामा भाग लिने नेवा खल कास्कीका अध्यक्ष अशोक पालिखे जानकारी दिए । प्रतियोगिताको सचिवालय उद्घाटन गर्दै नेवा खल कास्कीका अध्यक्ष पालिखेले ताया मचा प्रतियोगिताको तयारी तीव्र पारिएको बताए । उनका अनुसार प्रथम पुरस्कार ३ लाख ३३ हजार ३ सय ३३ रहेको छ ।

नेवारी संस्कृतिको संरक्षणका लागि प्रतियोगिता आयोजना गर्न लागिएको अध्यक्ष पालिखेको भनाइ छ । नृत्य ननिस्क्ने ठाउँमा तायामचा नृत्य निस्कियोस् भनेर नेवा खल कास्कीको सहयोगमा नेवार समुदायमा बाजाका पूरा सेट हस्तान्तरण गरिएको थियो ।

ताया मचा नृत्य प्रतियोगता संयोजक ईश्वर कर्माचार्यले २५ समूह सहभागी हुने जानकारी दिए । भदौ १४ गते आआफ्ना टोलमा नृत्य प्रदर्शनपश्चात् प्रतियोगितामा सहभागी हुने संयोजक कर्माचार्यले स्पष्ट पारे ।
संस्कृतिकर्मी तीर्थ श्रेष्ठले ताया मचा नाचमा चाहिने कुराहरूमा कमी आएकोमा चिन्ता व्यक्त गरे । उनले नाचमा टाउको कसरी हल्लाउने ? कसरी राग बजाउने लगायत मौलिक शैलीमा ध्यान दिनुपर्नेमा जोड दिए ।