पोखरा । भाष्कर मेमोरियल विद्यालयले कक्षा ११ मा भर्ना भएका विद्यार्थीहरुलाई स्वागत एवं परिचय कार्यक्रम बिहीबार भएको छ । विद्यालय व्यवस्थापन समिति अध्यक्ष माधवीदेवी बस्तोलाको अध्यक्षतामा भएको कार्यक्रममा प्रमुख अतिथि शिक्षा विकास एवं समन्वय इकाइ कास्कीका प्रमुख लोकनाथ आचार्य थिए ।

आचार्यले अनुशासन विद्यार्थीको गहना हो भन्दै उनीहरुलाई असल र सक्षम बनाउन विद्यालय र अभिभावकको भूमिका र दायित्व उत्तिकै रहने बताए ।
विद्यालयका निर्देशक विश्वराज बास्तोलाले शैक्षिक क्षेत्रमा अब्बल भएर देखिने विद्यार्थीलाई संस्थाले विशेष किसिमको सम्मान गर्ने र भविष्यमा अगाडि बढ्न सहयोग गर्ने बताए ।

सहप्राचार्य टीकाराम पौडेलले विद्यार्थीहरु लक्ष्यसम्म पुग्न निरन्तर रुपमा अध्ययनमा केन्द्रित हुनुपर्ने बताए । प्लस टु संयोजक श्रीकृष्ण श्रेष्ठले विद्यालयको नीति नियमबारे जानकारी गराए । शिक्षक प्रतिनिधि डा. बाबुराम अधिकारीले कुनै पनि शैक्षिक संस्था व्यवस्थापक, शिक्षक र विद्यार्थीहरुको त्रिकोणात्मक समन्वयबाट अगाडि बढ्ने हुँदा तिनै पक्षको उत्तिकै महत्व रहने बताए । कक्षा १२ का विद्यार्थीहरु सिर्जन बास्तोला र कविता रोकामगरले सञ्चालन गरेको उक्त कार्यक्रममा विभिन्न मनोरञ्जनमूलक प्रस्तुति राखिएको थियो । उक्त कार्यक्रमको समापन गर्दै सभापति माधवीदेवी वास्तोलाले विद्यालय गुणस्तरीय शिक्षा प्रदान गर्न प्रतिवद्ध रहेको बताइन् ।