पोखरा । नेकपा एमालेका सचिव एवं गण्डकी प्रदेश कमिटीका इन्चार्ज गोकर्ण विष्टले आफूहरू विगतका घटनाबाट पाठ सिक्दै एमालेलाई बहुमतसहितको पार्टीको रूपमा स्थापित गर्ने बताएका छन् । अब एमालेलाई जुरुक्कै उठाउने गरी कार्यक्षेत्रमा एवं जनताको घरघरमा गएर खटिनुपर्ने उल्लेख गरे । नेकपा (एमाले) कास्कीले ४५ औं पुष्पलाल स्मृति दिवसका अवसरमा आयोजित ‘नेपालको कम्युनिस्ट आन्दोलन कमरेड पुष्पलालको योगदान’ विषयक प्रवचन कार्यक्रमलाई सम्बोधन गर्दै सचिव विष्टले विगतका विकासका कामसँगैै आफ्ना योजना र विकासका खाका जनतालाई बुझाउन सबैलाई आग्रह गरे ।

कार्यक्रममा स्थायी कमिटी सदस्य खगराज अधिकारीले पुष्पलालको योगदानको चर्चा गर्दै उनको विचार दशकौंसम्म सान्दर्भिक रहने उल्लेख गरे । अधिकारीले नेपाली राजनीतिको पहिलो र नेतृत्वदायी पार्टी कम्युनिस्ट पार्टी भएको दाबी गर्दै त्यसको नेतृत्व अहिले एमालेले गरिरहेका सुनाए ।

एमाले कास्की इन्चार्ज तथा स्थायी कमिटी सदस्य थममाया थापाले विकास र समृद्धिको खाका निर्माणका लागि पुष्पलालको योगदान अतुलनीय रहेको बताइन् ।

एमाले कास्कीका अध्यक्ष मनबहादुर गुरुङको अध्यक्षतामा भएको कार्यक्रममा उपाध्यक्ष तेजनारायण अधिकारीले स्वागत र सचिव बैनबहादुर अधिकारीले सञ्चालन गरेका थिए ।