स्याङ्जा । एमाले अध्यक्ष केपी शर्मा ओलीले प्रधानमन्त्री प्रचण्डको भारत भ्रमण सफल नभएको टिप्पणी गरेका छन् । भ्रमणका क्रममा प्रचण्डले लिम्पियाधुरा, कालापानी मिचिएको कुरा नउठाएर मौन बसेको ओलीको कटाक्ष छ ।

आँधीखोला गाउँपालिकाको नवनिर्मित भवनको शुक्रबार उद्घाटन गर्दै ओलीले वर्तमान सरकारको कुनै गन्तव्य नभएको र कामभन्दा हल्लाको पछाडि लागेको आरोप लगाए ।

सरकारको काम गर्ने ल्याकत नभएको जनाउँदै पूर्व प्रधानमन्त्री समेत रहेका ओलीले आफ्नो कार्यकालको ३ वर्षमा विकासले फड्को मारेको दाबी गरे ।

‘विभिन्न १० पार्टी मिलेर बनेको सरकार कामभन्दा हल्लाको पछाडि लागेको छ,’ उनले भने, ‘सरकारले जनताको ढाड सेकाउने काम गरेको छ । निराश नहुनुस् अब एमालेले नै विकास र समृद्धि ल्याउने छ ।’ एमाले सधैँ प्रतिपक्षमा बस्ने पार्टी नभएको बताउँदै उनले सत्ताको लागि मरिहत्ते नगर्ने बताए ।

आँधीखोलाले ४ हजार वर्षको इतिहासलाई पालिका भवनले पहिचान गरेको उनले जनाए । आफू २०४२ सालमा स्याङ्जा जेल बस्दाको स्मरण गर्दै ओलीले स्याङ्जाले विकासमा ठूलो फड्को मारेकोमा खुसी ब्यक्त गरे ।

आफू प्रधानमन्त्री हुँदा यहाँका गाउँगाउँमा मोटरबाटो, बिजुलीबत्ती, खानेपानी पुगेको तथा पूर्वाधार, स्वास्थ्य, शिक्षामा ठूलो फड्को उनको दाबी छ । एकै दिन आफूले ३ सय ९६ योजनाको शिलान्यास गरेको बताउँदै ओलीले वर्तमान सरकारले भने बजेट कटौती गरेर विकास रोकेको छ भने । आँधीखोला गाउँपालिकाले २७ रोपनीमा ५ करोड ६४ लाखमा भवन निर्माण गरेको हो । ३४ कोठा र २ हलसहित निर्मित भवन ४ तलाको छ ।

यसैगरी, शुक्रबार नै एमाले अध्यक्ष ओलीले कालीगण्डकी गाउँपालिका भवनको समेत उद्घाटन गरे । कालीगण्डकीले ७ करोड ७० लाख लागतमा २२ कोठे अपांगमैत्री भवन निर्माण गरेको हो ।