प्रतियोगिताका लागि विद्यार्थीले थुपारे स्कुलमा फोहोर

आदर्श समाज सम्वाददाता
जेठ २२, २०८०
enviroment day (2)

पोखरा । माछापुच्छ्रे माध्यमिक विद्यालयको ग्रिनफोर्स क्लब–माछापुच्छ्रे ५० औं विश्व वातावरण दिवस मनाएको छ ।

क्लबले विद्यार्थीलाई पूर्व सूचना गरी आफ्नो घर वरपरको फोहर संकलन गरी बुझाउने प्रतियोगिता आयोजना गरेको थियो । प्रत्येक समूहमा १० विद्यार्थी सम्मिलित गरी ३० समूहले ५ सय १९ केजी फोहर संकलन गरेको क्लब अध्यक्ष नम्रता गुरुङले बताइन् ।

विजयी समूहलाई पुरस्कार वितरण गर्दै अन्नपूर्ण संरक्षण क्षेत्र सार्दिखोला चेकपोस्टका प्रमुख श्रीकृष्ण न्यौपानेले विद्यालयको रचनात्मक कामको प्रशंसा गरे ।

माछापुच्छ्रे २, भुर्जुङखोलास्थित माछापुच्छ्रे विद्यालयले प्रत्येक कक्षालाई भाषा, व्यवसाय, प्रकृति संरक्षण, नेतृत्व विकासलगायतका विभिन्न थिममा क्रियाशील गराइरहेको छ ।

विद्यालय प्रअ सन्तोष आचार्यले प्रत्येक कक्षालाई छुट्टाछुट्टै थिममा सक्रिय बनाउँदा सिकाइसमेत प्रभावकारी बन्दै गइरहेको बताए । करिब ७ सय विद्यार्थी नियमित अध्ययन गर्ने माछापुच्छ्रे मावि क्रियाकलापका आधारमा देशकै उदाहरणीय स्कुल हो । विद्यालयका शैक्षिक गतिविधि अवलोकन गर्न देशका थुप्रै विद्यालय त्यहाँ पुग्ने गरेका छन् ।

Related News

सम्बन्धित समाचार

hero news full width