पोखरा । विद्यार्थीमा रहेको प्रतिभा तथा सिक्ने इच्छाशक्तिलाई अझ सुदृढ बनाउने उद्देश्यले पोखराको मदरल्यान्ड माविमा शुक्रबार प्रदेशस्तरीय गणित हाजिरीजवाफ प्रतियोगिता आयोजना गरिएको छ ।

विद्यालयले एसईई दिएर नतिजाको पर्खाइमा बसेका विद्यार्र्थी लक्षित प्रदेश स्तरीय गणित हाजिरी जवाफ प्रतियोगिता शनिबारसम्म चल्नेछ । प्रतियोगितामा प्रदेशभरिबाट ४० समूहले भाग लिएको कार्यक्रम संयोजक तथा गणित शिक्षक विष्णु गौतमले जानकारी दिए । प्रतियोगिताको पहिलो दिन शुक्रबार सहभागी सम्पूर्ण विद्यार्थिलाई हाजिरीजवाफसम्बन्धी अभिमुखीकरण गरिएको थियो ।

गण्डकी विश्वविद्यालयका कूलपति प्राध्यापक डा.गणेशमान गुरुङले प्रतियोगिता उद्घाटन गरे । उनले आफ्नो अतीत सम्झँदै सम्मानित विद्यार्थीलाई बधाई तथा शुभकामना व्यक्त गरे । विश्व चर्चित विश्वविद्यालयमा पूर्ण छात्रवृत्ति पाएर अध्ययन गर्ने नेपाली विद्यार्थीहरू बिरलै भएका र तीमध्ये मदरल्यान्डबाट यति धेरै विद्यार्थीले विदेशका विश्वविद्यालयमा पूर्ण छात्रवृत्ति पाएकामा प्रशंसा गरे ।

मदरल्यान्ड माविले पूर्व विद्यार्थी सम्राट ढुंगानालाई इतिहास रच्न सफल भएकोमा सम्मानसहित पछिल्लो संस्करणको म्याकबुक उपहार प्रदान गरेको छ । मदरल्यान्डबाट कक्षा १२ सकेर उच्च शिक्षाका लागि विदेशी कलेज तथा विश्वविद्यालयमा छात्रवृत्तिमा नाम निकाल्न सफल विद्यार्थीलाई विद्यालयमा सम्मानपत्र, माला र दोसल्लाले सम्मान छ । पूर्ण छात्रवृत्ति पाएका विद्यार्थीहरू सम्राट ढुंगाना हावर्ड विश्वविद्यालय, ओस्कार दियाली कर्नेल कलेज अमेरिका, विभूषी तिमिल्सिना र दीक्षा गिरी स्वीट बेरियर कलेज अमेरिका, निशान्त चौधरी साउथ्रन मिसिसिपी विश्वविद्यालय अमेरिका, सन्देश आचार्य हाइनान नर्मल विश्वविद्यालय चीन, आलोक पौडेल मिसनिज स्टेट विश्वविद्यालय अमेरिका र प्रशान्त भण्डारी नेसनल मेडिकल कलेज नेपाललाई सम्मान गरिएको छ । यसवर्ष मात्र विद्यालयबाट १० जोड २ पूरा गरेका १४ जना विद्यार्थीहरूले अमेरिकामा पूर्ण छात्रवृत्तिमा नाम निकाल्न सफल भएको मदरल्यान्डले जनाएको छ ।

कार्यक्रममा विद्यालयका अंग्रेजी विषयका विभागीय प्रमुख बामनकुमार घिमिरेले सञ्चालन गरेको कार्यक्रममा प्राचार्य नारायण बराल, निर्देशक त्रिभुवन शर्मा रसम्मानित विद्यार्थी सम्राट ढुंगानालगायतले बोलेका थिए ।