पोखरा । सरकारले सांसद विकास कोष व्युँताएको छ । गत आवमा हटाइएकाे उक्त कोष वर्तमान सरकारले ब्युताएको हो ।

आर्थिक वर्ष २०८०/८१ को बजेट प्रस्तुत गर्दै अर्थमन्त्री डा प्रकाशशरण महतले सांसद विकास कोष व्युँताएको बताए । एउटा योजनामा कम्तीमा १ करोड राख्नुपर्ने गरी प्रति सांसद ५ करोड रुपैयाँ विनियोजन गरिएको हो ।

सुशील कोइराला प्रधानमन्त्री भएको बेला ‘पूर्वाधार विकास कोष’को अवधारणा सुरु भएको थियो । पछि त्यसको नाम फेरेर ‘सांसद विकास कोष’ र ‘स्थानीय पूर्वाधार विकास साझेदारी कार्यक्रम’ भन्न थालियो । यस कार्यक्रम अन्तर्गत संघीय संसद निर्वाचन क्षेत्रमा ६ करोड रुपैयाँको दरले बजेट विनियोजन हुने गरेको थियो । तर यो रकम विकासको नाममा कार्यकर्तामा बाँडेर दुरुपयोग हुने गरेको भन्दै आलोचना हुँदै आएको थियो ।