पोखरा । सिर्जनशील लोकतान्त्रिक प्रतिष्ठान, पोखराको आयोजनामा जेठ १२ र १३ गते प्राज्ञिक लेखन कार्यशाला तथा भाषा साहित्य विषयक गोष्ठी भएको छ ।
गोष्ठीको उद्घाटन गर्दै कार्यक्रमका पोखरा विश्वविद्यालयका उपकुलपति प्राडा प्रेमनारायण अर्यालले भाषा, साहित्य र कला राष्ट्रका गहना भएको बताए । उनले निरन्तरको अध्ययन र अनुसन्धानबाट मात्र नयाँ नयाँ ज्ञानको निर्माण हुने र यसले समाज रूपान्तरणमा सहयोग मिल्ने धारणा राखे । हाम्रो धर्म र कर्म भनेकै नैतिकता र सदाचार भएकाले यसलाई सदैव ख्याल गर्नुपर्नेमा जोड दिए । गोष्ठीले सहभागीहरूको अनुसन्धान क्षमता वृद्धि गर्नमा सहयोग पुग्ने विश्वास व्यक्त गरे ।
गोष्ठीको पहिलो दिनको अनुसन्धान कार्यशालामा अनुसन्धान पत्र लेखनका सैद्धान्तिक र व्यावहारिक विषयमा विमर्श भयो । कार्यशालाको पहिलो सत्रमा सहप्राध्यापक दीपेन्द्र पराजुली तथा उपप्राध्यापक हिममाया पौडेलले अनुसन्धान पत्र लेखनमा विषय क्षेत्र छनोट, शीर्षक चयन, अनुच्छेद विन्यास, सार लेखन र तथ्यांकको विश्लेषणमा केन्द्रित रही कार्यशाला गराए । कार्यशालामा समूह कार्य गराई प्रस्तुतीकरण गराइएको थियो ।
यसैगरी दोस्रो सत्रमा सहप्राडा नवराज न्यौपाने र उपप्राध्यापक डा. पीताम्बर पौडेलले अनुसन्धानात्मक लेख प्रकाशन प्रक्रियामा देखिने समस्या र समाधानका उपायमा केन्द्रित रही कार्यशाला गराए । अनुसन्धानात्मक लेख लेखन र प्रकाशन दुवै चुनौतीपूर्ण र गौरवमय कार्य भएकाले यसमा शोधार्थीको अठोट आवश्यक पर्ने बताए ।
गोष्ठीको दोस्रो दिन समूह छलफल गराइएको थियो । उक्त छलफलमा सहप्राध्यापक डा. लक्ष्मीशरण अधिकारी, सहप्राध्यापक दीपेन्द्र पराजुली र उपप्राध्यापक सविन्द्रराज भण्डारीले ‘साहित्यमा उत्तरआधुनिकता र वर्तमानमा यसको उपयोग’ शीर्षकमा आआफ्नो विचार राखे । यसमा सर्वप्रथम डा.सविन्द्रराज भण्डारीले सम्बन्धित विषयमा केन्द्रित रही अवधारणा प्रस्तुत गरेपश्चात् समूह छलफललाई सघन बनाइएको थियो ।
उत्तरआधुनिकता पछिल्लो समयमा विभिन्न क्षेत्रमा देखापरेको वाद भएको तथा वर्तमानमा मेटामोडनिज्म र ट्रान्समोडनिज्म आइसकेका सन्दर्भमा साहित्यमा उत्तरआधुनिकताको प्रभाव र वर्तमानमा यसको सान्दर्भिकताबारे बहस गरिएको हो । छलफलमा सहभागीहरूले यस वादको प्रभावलाई समाज र जीवनसँग जोडेर जिज्ञासा राखेका थिए । समूह छलफलको सहजीकरण उपप्राध्याक डा. भूमिराज बस्ताकोटीले गरेका थिए ।
दोस्रो दिनको दोस्रो सत्रमा प्राडा शालिग्राम सुवेदीले ‘संस्कृत र नेपाली भाषाका उपसर्गमा रहेको भिन्नता’ लाई स्पष्ट पारे । उनले पाणिनीय व्याकरणमा २२ ओटा उपसर्गको उपयोग पाइने र संस्कृत व्याकरणमा यसैलाई आत्मसात् गरिएको तथा नेपाली भाषामा आगन्तुक उपसर्गसमेत जोड्दा उपसर्गको संख्या बढ्न सक्ने बताए । उनले संस्कृतमा उपसर्ग निश्चित र दोषमुक्त भएका तथा नेपालीमा उपसर्ग अनिश्चित र दोषयुक्त भएकाले नेपालीमा उपसर्गको तथ्यपरक अध्ययन गरेर संख्या निर्धारण गर्न आवश्यक रहेको स्पष्ट पारे ।
गोष्ठीको समापन सत्रमा प्राडा कुसुमाकर न्यौपानेले कार्यक्रमले शोधार्थीमा ज्ञानको क्षितिज फराकिलो हुने बताए । यसै गरी सहभागीहरूको तर्फबाट उपप्राध्यापक गोविन्दप्रसाद गैरे र उपप्राध्यापक नारायणी पौडेलले कार्यशाला र गोष्ठीबाट सिकेका अनुभवलाई आफूले कार्यक्षेत्रमा उपयोग गर्न आतुर रहेको धारणा राखे । कार्यक्रममा सहप्राध्यापक अम्बिकाप्रसाद भट्टराईले गीत तथा उपप्राध्यापक सुरज पौडेलले मुक्तक सुनाएका थिए । गोष्ठीमा सहप्राध्यापक आनन्दमणि रिजाल, प्राडा यमबहादुर पौडेल क्षेत्री, उपप्रा सञ्जीव खनाल, उपप्राध्यापक सुलोचना खनाल, साहित्यकारहरू तारा पाखे, डा. टीकाराम आरुणी, गणेश चालिसे, सागर पनेरु, मणि डुम्रे लगायतले भाषा साहित्य र अनुसन्धानका विषयमा जिज्ञासा राखेका थिए ।
Related News
सम्बन्धित समाचार
रोजगार खोज्दै मेलामा
पोखरा भिलेज अब चारतारे
पोखरा १० का सामुदायिक विद्यालयलाई स्टे्सनरी सहयोग
भुजेल समाजको रक्तदान
स्पोर्टस् अवार्डमा सहयोग प्रतिबद्धता
hero news full width
मुख्य समाचार
कतारी अमिरलाई ‘रुद्रकली’ र ‘खगेन्द्रप्रसाद’ !
फेवातालमा दुर्घटनामा परेका ५ जनाको उद्धार
वैशाख ११, २०८१लोकतन्त्रका १८ वर्ष : लोकतन्त्रले छोएन लोकलाई
वैशाख ११, २०८१कामचलाउ सरकारको आयु लम्बियो
वैशाख ११, २०८१गण्डकी सरकारविरुद्दको मुद्दा हेर्दाहेर्दैमा, आज टुंगो लागेन
वैशाख १०, २०८१कतारी राजा नेपाल आउने दिन भोलि सार्वजनिक बिदा
वैशाख १०, २०८१