पोखरा । पोखरा १६ को समन्वय एवं आर्थिक सहयोगमा ग्रीन भ्याली बहुउद्देशीय सहकारीको आयोजनामा फोहोर व्यवस्थापनसम्बन्धी अभिमुखीकरण गरिएको छ । स्रोतबाट नै फोहोर व्यवस्थापन गर्न, प्रत्येक घर र शैक्षिक संस्थाबाट निस्कने फोहरको उचित विसर्जन गर्न सामग्री वितरण गरिएको थियो ।
सहकारीका अध्यक्ष प्रकाश आचार्यले शैक्षिक संस्था र टोल समुदायले फोहोर वर्गीकरण र व्यवस्थापनको दिगो समाधानका अभ्यास गर्न सके ल्यान्डफिल्ड साइट जाने फोहोर ९० प्रतिशत कम हुने बताए ।
कार्यक्रम संयोजक तथा वडा सदस्य रामचन्द्र आचार्यले सामुदायिक शैक्षिक संस्थाका पूर्वाधार विकासमा सहयोग रहने भन्दै ग्रीन भ्याली रिसाइकल सहकारीको फोहोर व्यवस्थापन प्रयासलाई विस्तार गर्ने प्रतिबद्धता जनाए ।
चण्डिका आधारभूत विद्यालय व्यवस्थापन समितिका अध्यक्ष सन्दीप थापाले पोखरा १६ मा वर्गीकृत फोहोर संकलन गर्ने ग्रीन भ्यालीलाई कुहिने र ल्यान्डफिल्ड साइट जाने न्यून फोहोरको ढुवानी जिम्मा पनि दिनसके थप प्रभावकारी हुने धारणा राखे । पोखरा १६ जुम्लेटीस्थित शान्ति माविमा भएको कार्यक्रम सञ्चालन शिक्षक शंकर लामिछानेले गरेका थिए ।
कार्यक्रममा सरसफाई तालिम तथा प्रशिक्षणपछि कुहिने, नकुहिने र अन्य फोहोर राख्न पोखरा १६ का सबै सामुदायिक विद्यालयलाई हरियो, रातो र निलो रंगका ३÷३ वटा डस्टबिन वितरण गरिएको ग्रिन भ्यालीका व्यवस्थापक गोविन्द आचार्यले जानकारी दिए ।