हेमजा । पिल्लर भाँचिएको पनि करिब १ वर्ष बित्न लाग्यो । अझै पनि मर्मतको सुरसारै छैन । केवल पुल ढल्न नदिन भन्दै भाँचिएको पिल्लर नजिकै तारजाली भर्नमात्रै सुरु गरिएको छ । त्यो पनि सुस्त गतिमा । यो पाराले चाँडै नै पुल मर्मत होला र त्यसमाथिबाट ठूला सवारी ओहोरदोहोर गर्लान्, ढुक्कले आफू पनि हिँड्न पाइएला भन्ने त्यति भरोसा नै छैन कृष्णबहादुर परियारलाई ।

म्यादी स्थायी निवासी परियार कामको सिलसिलमा हाल मर्दी दोभानस्थित क्षतिग्रस्त सेतीनदीको पुल नजिकै हेमजातिरको खण्डमा बस्छन् । उनलाई दैनिक पुरुञ्चौरतर्फ आउजाउ गर्नुपर्दछ । त्यसका लागि उनले सो भाँचिएकै पुलको सहारा लिनुपर्दछ ।

भाँचिएको १ वर्ष पुग्न लाग्दासमेत मर्मत नभएपछि मर्दी दोभानस्थित उक्त पुलबाट दैनिक आवातजावतमा समस्या भइरहेको छ ।

पुलबाट जोखिम मोलेरै कतिपय मानिसहरू आवातजावत गर्न बाध्य हुनुपरेको छ भने मोटरसाइकलका लागि काठे पुलको सहारा लिनु परेको छ । जुन सुरक्षाका हिसाबले अत्यन्तै जोखिमपूर्ण छ । पुलबाट ठूला तथा मझौला सवारी सञ्चालन गर्न सक्ने कुनै सम्भावना नै छैन ।

बाढीका कारण गत वर्ष असार ४ गते भाँचिएको उक्त पुलको पूर्वी पिल्लर मर्मतका लागि हालसम्म कुनै पनि निकायले चासो देखाएका छैनन् । त्यसकारण स्थानीयहरूलाई पोखराको हेमजा, पुरुन्चौर, सार्दीखोला, लाहाचोक, घाचोकलगायत स्थानमा आवातजावतमा समस्या परेको छ ।

पुल संरक्षण गर्नुको साटो बरु उल्टै पुल नजिकैका क्षेत्रमा सेती नदी उत्खनन्को कार्य भइरहेको देख्न सकिन्छ ।

कुल ५० मिटर लामो उक्त पुल मर्मत गर्न नसके पनि वर्षामा ढल्ल नदिने उद्देश्यका साथ तारजाली (गेभिन) चिर्न लागिएको पोखरा १९ का वडाध्यक्ष पुपेन्द्र पाण्डेले जानकारी दिए ।

अहिलेलाई प्रदेशको बजेटबाट पुल संरक्षण गर्ने उद्देश्यमात्रै राखिएको छ । ‘सडक विभागमार्फत निर्माण गरिएको पुल मर्मतको फाइल अर्थ मन्त्रालयमा गएर रोकिएको छ । अर्को आवमा त्यो फाइल अगाडि बढे बजेट विनियोजन हुनेछ भन्ने आशामा छौं,’ अध्यक्ष पाण्डेले भने ।