पोखरा । वडास्तरीय फुटबल प्रतियोगिताको सेमिफाइनल समीकरण पूरा भएको छ । पोखरा महानगरपालिका खेलकुद विकास समितिले आयोजना गरेको प्रतियोगितामा पोखरा–१५, पोखरा–३०, पोखरा–१४ र पोखरा–२७ अन्तिम चारमा पुगन सफल भएका हुन् ।

खेलकुद विकास समिति सदस्यसचिव सुवास खड्काका अनुसार मंगलबार वडा १५ ले वडा १३ लाई ४–१ ले हरायो । वडा ३० ले ८ लाई ३–२, वडा १४ ले ३२ लाई २–०, वडा २७ ले २४ लाई ४–३ अन्तरले पराजित गर्दै सेमिफाइनल पुगेका हुन् ।

पोखरा रंगशालास्थित फुटबल मैदानमा बुधबार पहिलो सेमिफाइनलमा वडा १५ र ३० तथा अर्कोमा १४ र २७ बीच प्रतिस्पर्धा हुने आयोजकले जनायो ।

कास्की जिल्ला फुटबल संघको प्राविधिक सहयोगमा भइरहेको प्रतियोगितामा पोखरा महानगरपालिकाका ३३ मध्ये ३० वडाको सहभागिता छ । विजेता वडाले १ लाख ५० हजार र उपविजेताले १ लाख रूपैयाँसहित ट्रफी, मेडल र प्रमाणपत्र पुरस्कार पाउने सदस्यसचिव खड्काले जानकारी दिए । सर्वोत्कृष्ट खेलाडीलाई १५ हजार रूपैयाँ र उत्कृष्ट डिफेन्डर, उत्कृष्ट गोलरक्षक, उत्कृष्ट मिडफिल्डर, उत्कृष्ट फरवार्ड, उत्कृष्ट प्रशिक्षकलाई ५–५ हजार रूपैयाँसहित ट्रफी र प्रमाणपत्र पुरस्कार दिइने छ । फाइनल बिहीबार हुनेछ ।