पोखरा । उपचार खर्च अभावमा गण्डकी मेडिकल कलेजको सर्जिकल वार्डमा छटपटाइरहेकी तमकुमारी रोकामगरलाई पोखरा आध्यात्मिक तथा सिप विकास केन्द्रले १५ हजार सहयोग गरेको छ ।

तमकुमारीका पति विकल रोकामगरलाई ब्रम्हकुमारी ईश्वरीय विश्वविद्यालय ओम शान्तिको संरक्षित संस्था पोखरा आध्यात्मिक तथा सिप विकास केन्द्रका अध्यक्ष ब्रह्मकुमार मनिराज पोखरेलले उक्त रकम हस्तान्तरण गरेका हुन् ।

पोखरा १० का बेलायती भूपू सैनिक ८६ वर्षीय टेकबहादुर गुरुङले अस्पतालमै पुगेर ७ हजार सहयोग गरेका छन् ।

खेतीपाती र घरगृहस्थी चलाइरहेकी २२ वर्षकी तमकुमारी २६ वैशाखमा घाँस काट्न जाँदा भीरबाट लडेर गम्भीर घाइते भएकी हुन् । उनी म्याग्दीको मालिका ३, पात्लेकी रैथाने वासिन्दा हुन् । पोखरामा उपचाररत तमकुमारीका ८ महिनाकी छोरी र ४ वर्षका छोरा अहिले गाउँमै छन् ।

पति विकल रोकामगरले उपचारको लागि २५ हजार जोहो गरेका थिए । एम्बुलेन्समा पोखरा ल्याउँदा १२ हजार सकियो । आमा चन्द्रकली पुनमगरले ३० हजार ऋण खोजेर छोरीको उपचारमा पहल गरिन् । परिवारसँग भएको रकम सकिएपछि थप उपचारका लागि भौतारिएका विकललाई साथ दिइरहेकी छन् सामाजिक अभियन्ता तथा आफन्ती भीमसरा घर्तीमगरले । भीमसराको पहलमा स्थानीय व्यक्ति, संघसंस्था, मालिका गाउँपालिकाको कार्यालय र कतारमा रहेका नेपालीले सहयोग गर्दा ३ लाख ७ हजार २ सय ५ संकलन भएको छ ।