हेमजा । नेलम्बो नेपालले रुपा गाउँपालिकामा निशुल्क दन्त शिविर गरेको छ । गाउँपालिकाको समन्वयमा वडा नं. ५ देउरालीस्थित विश्व शान्ति माविमा सञ्चालन भएको शिविरबाट ३ सय ३ जना लाभान्वित भए ।

५ दिनसम्म चलेको शिविरमा दन्त परीक्षण, दाँत भर्ने, दाँत निकाल्ने, दाँत सफा गर्ने, दाँतको एक्सरे, गिजाको उपचार दाँतको जरैदेखि उपचार (आरसिटी) का साथै औषधीसमेत वितरण गरिएको थियो । शिविरमा डा.सिजन मर्सानीको नेतृत्वमा ८ जना स्वास्थ्यकर्मीको टोली उपचारमा संग्लन थियो ।

गाउँपालिका अध्यक्ष नवराज ओझाले नेलम्बोसँग सहकार्य गर्न पाएकोमा खुसी व्यक्त गर्दै आफ्नो अघिल्लो कार्यकालमा पनि थुपै क्रियाकलाप सञ्चालन गरेको स्मरण गरे । वडाध्यक्ष राजन खनालले शिविरको प्रशंसा गर्दै मानवीय सेवाका क्रियाकलापलाई नेलम्बोले निरन्तरता दिनुपर्नेमा जोड दिए ।

नेलम्बोका कार्यक्रम संयोजक भीमप्रसाद भण्डारीले बिरामीहरूलाई फलोअप गरी पुन: उपचार पनि गरिने स्पष्ट पारे ।