पोखरा । एनएमबि लघुवित्त वित्तीय संस्थाको आयोजनामा पोखरामा प्रादेशिकस्तरीय बजेट योजना तथा व्यावसायिक रणनीतिक कार्यशाला भएको हो ।

२ दिनसम्म चलेको कार्यशालाको उद्घाटन गर्दै संस्थाका प्रमुख कार्यकारी अधिकृत आनन्द पाण्डेले कार्यशालाको उद्देश्य र महत्वबारे जानकारी दिएका थिए ।

कार्यशालामा सात वटै प्रदेशका प्रादेशिक कार्यालय र सो अन्तर्गतका क्षेत्रीय स्टेसनहरुको लक्ष्य/प्रगति, भावी योजना, अनुभव आदानप्रदान, आर्थिक वर्ष २०७९/०८० असार मसान्तको प्रोजेक्सन र आगामी आर्थिक वर्षको रणनीति तथा लक्ष्य निर्धारण, शाखा ब्यवस्थापन, शाखा संचालन व्यवस्थापनमा प्रादेशिक प्रमुख, क्षेत्रीय प्रवन्धकको भूमिका, शाखा अनुगमन, ब्यवसायिक रणनीति/कृषिमा आधारित नयाँ कर्जा प्रोडक्टबारे प्रशिक्षण दिइएको थियो । यस्ते, ग्राहक पहिचान तथा बचत खाता व्यवस्थापन, भाखा नाघेको कर्जा व्यवस्थापन, जनशक्ति ब्यवस्थापन, लघुवित्त सञ्चालनका क्रममा आइपरेका समस्याको समाधान, कर्जा लगानी व्यवस्थापनबारे पनि विभागीय प्रमुखबाट प्रशिक्षण दिइयो ।

संस्थाका नायव प्रमुख कार्यकारी अधिकृत बिरुराम जैशीले नियामक निकायबाट जारी निर्देशन, भावी योजना रणनीति तथा अन्य समसामयिक विषयमा कर्मचारीलाई मार्गनिर्देशन गरेका थिए ।
कार्यशालामा केन्द्रीय कार्यालयबाट सबै विभागीय प्रमुखहरु तथा विभागमा आवद्ध कर्मचारी, ७ वटै प्रदेशका प्रादेशिक कार्यालयका प्रादेशिक प्रमुख र प्रादेशिक कार्यालयअन्तर्गतका क्षेत्रीय स्टेसनमा कार्यरत क्षेत्रीय प्रबन्धक गरी करिब ४५ जनाले भाग लिएका थिए ।

संस्थाको केन्द्रीय कार्यालय पोखराको हेमजामा छ । संस्थाले ६८ जिल्लामा १ सय ४८ वटा शाखा उपशाखा बिस्तार गरेको छ । करिब १ लाख २० हजार विपन्न घरपरिवारलाई लघुवित्त सेवा प्रदान गर्दै आएको जनाएको छ ।