पोखरा । गण्डकी प्रदेश सभा सदस्य प्रकाश बरालले जिउँदो इतिहासका रुपमा रहेका आमाबुवा राष्ट्रका अमूल्य सम्पत्ति भएको बताएका छन् ।

बुधबार प्रभा पौडेल सुवेदीद्वारा प्रकाशित पुस्तक ‘आमा २’ विमोचन गर्दै उनले आफ्नो जीवनकालभरि परिवार, समाज र राष्ट्रका लागि महत्वपूर्ण योगदान दिएका आमाको ज्ञान सीप र अनुभवलाई राष्ट्र निर्माणमा उपयोग गर्नुपर्नेमा जोड दिए । कांग्रेस गण्डकी प्रदेश सभापति शुक्रराज शर्माले नैतिक शिक्षाको अभावले समाज विकृत हँुदै गएको बताए । संसारको बहुमूल्य ज्ञान आमाबाटै प्राप्त हुने भन्दै उनले आमाको महिमा अपरम्पार रहेको बताए ।

पुस्तकका लेखक दुर्गा अधिकारीले संसारमा आमाको महत्व शब्दमा व्यक्त गर्न नसकिने भन्दै विभिन्न धर्म ग्रन्थले समेत आमाको महिमालाई वर्णन गरेको बताइन् । उनले सामान्य लेखपढ गर्न सक्ने व्यक्तिले पनि सजिलै बुझन सकूँन् भन्ने उद्देश्यले पुस्तकलाई सरल भाषा र शब्दमा लेखिएको जानकारी दिइन् ।

नेपाल पत्रकार महासंघका केन्द्रीय सदस्य सरिता तिम्सिना पगेनीले सन्तानको सबैभन्दा नजिकको साथी आमा हुने भन्दै आमासंग सन्तानले हरेक सुखदुख बाँड्न सक्ने बताइन् ।

प्रकाशक सुवेदीले आमाको ८१ आंै जन्मोत्सवमा आमाले प्रदान गरेका ज्ञान, शिक्षा, वंश, शाखा सन्तानमा जानकारी दिने उद्देश्यले पुस्तक प्रकाशनमा ल्याएको बताइन् । उनले आमाको सम्मान र श्रद्धामा यो पुस्तक आमा २ प्रकाशन गरेकी हुन् ।

ब्रम्हकुमारी ईश्वरीय विश्वविद्यालय पार्दी शाखा प्रमुख ब्रम्हकुमारी राजयोगिनी अप्सराले मानिस भौतिक सुख प्राप्तिका लागि दौडधूपका कारणले समाजमा अशान्ति बढेको उल्लेख गर्दै शान्तिका लागि आत्मिक ज्ञानको महत्वपूर्ण भूमिका रहने बताइन् । कार्यक्रममा प्रकाशककी आमा इन्दिरा शर्माले कविता बाचन गर्नुभएको थियो । कार्यक्रम प्रकाशकका पिता नेत्रविलास शर्माको अध्यक्षतामा भएको हो ।