पोखरा । कर्मचारी बचत तथा ऋण सहकारी संस्थाले शनिबार आयोजना गरेको रक्तदान कार्यक्रममा २८ युनिट रगत संकलन भएको छ । संस्थाको १६ औं स्थापना दिवसको अवसरमा रक्तदानप्रति नयाँ रक्तदातालाई प्रेरित गर्ने उद्देश्यले आयोजित रक्तदानमा २८ युनिट रगत संकलन भएको हो ।

कार्यक्रममा प्रदेश सभा सदस्य प्रकाश बरालले पहिलो रक्तदाता सुरेशकुमार श्रेष्ठलाई ब्लड ब्याग हस्तान्तरण गरी कार्यक्रम सुरु भएको संस्थाका अध्यक्ष महेश सिग्देलले जानकारी दिए । पहिलो रक्तदाताले ५७ औं पटक रक्तदान गरेको उनले बताए ।

रक्तदान कार्यक्रमका लागि रक्तसञ्चार केन्द्र पोखराले प्राविधिक सहयोग उपलब्ध गराएको थियो । कार्यक्रममा प्रदेश सभा सदस्य बरालले मानिसहरूको भावनामा सकारात्मक परिवर्तन ल्याउन रक्तदान कार्यक्रमलाई अभियानकै रूपमा सञ्चालन गर्दै आएको उल्लेख गरे ।