पोखरा । पोखराको माटेपानीस्थित आनन्दित गृह नेपालमा पुरानै कार्यसमिति दोहोरिएको छ । संस्थाको शनिबार नवांै साधारणसभा तथा पाँचौं अधिवेशनले डा. यज्ञमान शाक्यको अध्यक्षतामा ७ सदस्यीय नयाँ कार्यसमिति सर्वसम्मत चयन गरेको हो । समिति उपाध्यक्ष डा. पदम खड्का, सचिव रुमा राउत शाक्य, कोषाध्यक्ष मेजरमान बज्राचार्य छन् । सदस्यमा छवि गौडेल, सुशीला खनाल र रमेश ताम्राकार चयन भए । रमेश मात्र नयाँ सदस्य हुन् । कार्यकाल २ वर्षको हुनेछ ।

हाडजोर्नी विशेषज्ञ डा. यज्ञमान शाक्यले ज्येष्ठ नागरिकको शारीरिक, मनोसामाजिक, आध्यात्मिक तथा आर्थिक समस्यालाई मध्यनजर गरी २०७० सालमा आफ्नै घरमा आनन्दित गृह (ह्याप्पी होम) खोलेका थिए । यहाँ ९ जना आश्रित छन् । तीमध्ये ६ जना ९० वर्षमाथिका हुन् । आनन्दित गृहमा २५ जना आवासीय तथा ५० जना दिवा सेवामा बस्न मिल्ने क्षमता रहेको अध्यक्ष डा. शाक्यले बताए ।

दिवामा दैनिक यहाँ करिब ४० जना जति ज्येष्ठ नागरिक आउँछन् । उनीहरु भजनकीर्तन, प्रवचन सुन्नुका साथै योग गरी खाजा खाएर फर्किन्छन् । यसअघि साधारणसभाको उद्घाटन गर्दै पोखरा १२ का वडाध्यक्ष सन्तोष बास्तोलाले सरकारले गर्नुपर्ने काम व्यक्तिले गरेको भन्दै आनन्दित गृहको सफलताको कामना गरे ।

कार्यक्रममा श्रद्धासुमन ज्येष्ठ नागरिक प्रालिका नीरज थापा, संस्थाका आजीवन सदस्य गोपाल गुरुङ, महिलाको तर्फबाट मीरा सिग्देल लगायतले बोलेका थिए । कार्यसमिति सदस्य सुशीला खनालले स्वागत र सदस्य छवि गौडेलले संचालन गरेका थिए । सो अवसरमा सहयोगी दाता तथा आजीवन सदस्यलाई सम्मान गरिएको थियो ।