पोखरा । नेपाल मगर संघ गण्डकी प्रदेशको दोस्रो अधिवेशन पोखरामा हुने भएको छ । नेपाल पत्रकार संघ गण्डकीले शुक्रबार पोखरामा पत्रकार सम्मेलन गरी नेपाल मगर संघ कास्कीको हलमा हुने अधिवेशनबारे जानकारी दिएको हो ।

अधिवेशनले नयाँ नेतृत्व चयनदेखि कौरा नृत्य प्रदर्शनीसहित भाषा, संस्कृति संरक्षणको भूमिकाका विषयमा ध्यान दिने मगर संघ गण्डकीका अध्यक्ष सिद्धान्त थापामगरले जानकारी दिए । ‘ऐतिहासिक दोस्रो प्रदेश अधिवेशनको तयारीको अन्तिम चरणमा पुगेका छौं’, अध्यक्ष थापामगरले भने, ‘अधिवेशनले विधि विधानमा टेकेर नयाँ नेतृत्व गर्नेछ ।’

अधिवेशनमा ११ जिल्ला समिति, ६ वटा भातृ संस्थाबाट २ सयभन्दा बढी प्रतिनिधिको सहभागिता रहने भएको छ । त्यसैगरी करिब ५० जना बढी अतिथि सहभागी रहनेछन् । अधिवेशनको प्रमुख अतिथिमा केन्द्रीय अध्यक्ष ज्ञानेन्द्र पुनमगर रहने वरिष्ठ उपाध्यक्ष गणेश थापाले जानकारी दिए ।

गण्डकी प्रदेशमा ४ लाख ५१ हजार ३ सय ६५ मगर जातिको जनसंख्या रहेको उपाध्यक्ष तारा थापामगरले जानकारी दिइन् । अधिवेशनमा गण्डकीका ८५ पालिकामध्ये ७० पालिकाको सहभागिता रहने उनले बताइन् ।