लमजुङ । भ्रष्टाचार बढार्न सांकेतिकस्वरुप बास नेपालले लमजुङका प्रमुख जिल्ला अधिकारीलाई कुचोसहितको ज्ञापनपत्र बुझाएको छ ।

नवआगन्तुक प्रजिअ रामकृष्ण अधिकारीलाई जिल्लामा भएका, भइरहेका र हुने भ्रष्टाचार बढार्न सहज होस् भन्ने उद्देश्यले सांकेतिक रुपमा कुचो सहितको ज्ञापनपत्र शुक्रबार बुझाइएको हो । २२ वर्षदेखि भ्रष्टाचारविरुद्धको अभियान सञ्चालन गरिरहेको एम्नेष्टि इन्टरनेसनलसँग समेत सहकार्य गरिरहेको संस्था बास नेपालले कुचोसहितको ११ बुँदे ज्ञापनपत्र बुझाएको बास नेपालका सचिव वासुदेव सेढाईंले बताए ।

बास नेपालका सल्लाहकार रमाराज खनियाँका अनुसार सरकारी कार्यालय तथा स्थानीय तहमा हुने भ्रष्टाचारका अतिरिक्त बजारमा बेचिने मूल्य र वैध मिति उल्लेख नभएका, कम तौलका खाद्यसामग्री तत्काल जफत गर्न सुझाव दिइएको छ । ज्ञापनपत्र बुझाउन बास नेपालको सल्लाहकार समितिका जिल्ला संयोजक नवराज पहाडीको नेतृत्वमा गएको टोली पुगेको थियो ।