पोखरामा वडास्तरमा खेलकुद

आदर्श समाज सम्वाददाता
चैत्र १६, २०७९
badminton

पोखरा । चैते दसैं अवसरमा पोखरा महानगरपालिका वडा ८ ले वडाध्यक्ष कप वडास्तरीय ब्याडमिन्टन प्रतियोगिता गरेको छ । स्वस्थ्यसँगसँगै खेलकुदमार्फत आपसी भाइचारा विकास गर्ने उद्देश्यले २ दिनसम्म आयोजित प्रतियोगितामा ४२ जना खेलाडीले भाग लिएका थिए । वडाध्यक्ष रुद्रनाथ बराल आफैँ पनि ¥याकेट लिएर कोर्ट उत्रिएका थिए । अशोक श्रेष्ठसँग मिलेर जोडी बाँधेको उनको टिम भेट्रान्सतर्फ दोस्रो हुन सफल भयो ।

पोखराको मुख्य बजार क्षेत्रमा पर्ने वडा ८ ले दोस्रोपल्ट यसखालको प्रतियोगिता गरेको हो । सामाजिक विकाससँगै वडाले खेलकुदमार्फत थप चिनारी दिंदै आएको वडाध्यक्ष रुद्रनाथ बराल बताउँछन् । आफ्नो पहिलो कार्यकालमा सुरुआत भएको प्रतियोगिता आगामी वर्षमा पनि निरन्तरता दिने उनले बताए ।

प्रतियोगिताको उद्घाटन र समापनमा उपस्थित छिमेकी वडाका अध्यक्षहरुले पनि आफूहरुले पनि खेलकुदलाई प्राथमिकता दिने जनाए । वडा ५ का वडाध्यक्ष विष्णुप्रसाद बराल, वडा ७ का अध्यक्ष राममोहन आचार्य र वडा ९ का अध्यक्ष दीपेन्द्र मर्सानीले सो प्रतिबद्धता जनाएका हुन् ।

खेलाडीको हौसला वृद्धिका लागि प्रतिनिधि सभा सदस्य विद्या भट्टराई पनि समापनमा उपस्थित भइन् । उनले खेलकुदको विकास ग्रासरुटबाटै हुनुपर्नेमा जोड दिइन् । उनले वडास्तरमा यसखालका प्रतियोगिताले अनुशासन, शारीरिक एवं मानसिक स्वास्थ्यमा सघाउ पुग्ने बताइन् । खेल पर्यटनबाट पोखरालाई विश्वसामु चिनाउन सकिने उनको तर्क थियो । खेल क्षेत्रमा कुल बजेटको ८ प्रतिशतमात्र विनियोजनले पर्याप्त नहुने भन्दै सांसद भट्टराईले आफूले संसदमा नीति निर्माणसँगसँगै थप बजेट विनियोजनमा पहल गर्ने बताइन् । पोखरामा अन्तर्राष्ट्रिय क्रिकेट रंशगाला निर्माणमा हुनुपर्नेमा पनि उनको जोड थियो ।

युनिक ब्याडमिन्टन क्लब संयोजनमा सिर्जनाचोकस्थित बराल सामुदायिक भवनको हलमा भएको प्रतियोगितामा सुरेश तामाङ र नारायण रानामगरको जोडीले खुलातर्फ उपाधि जितेको छ । दिल सुनारी र श्याम थापाको जोडीलाई २१–१६ र २१–१५ सोझो सेटमा हराउँदै उपाधिसहित ट्रफी, मेडल र प्रमाणपत्र हात पारेको हो । देवन थापा र सूर्यबहादुर थापाको जोडी तेस्रो भयो ।

भेट्रान्सतर्फ सरोज श्रेष्ठ र सुनिल पौडेलको जोडी पहिलो भयो । वडाध्यक्ष रुद्रनाथ बराल र अशोक श्रेष्ठको जोडीलाई १४–२१, २१–१९ र २१–९ सेटमा पराजित गर्दै सरोजको जोडीले उपाधि जितेको हो । सो इभेन्टमा फुर्वा छिरिङ गुरुङ र रविनकुमार विश्वकर्माको जोडी तेस्रो भयो ।

विजयीलाई सांसद भट्टराईले खेल सामग्रीसहित ट्रफी, मेडल र प्रमाणपत्र पुरस्कार हस्तान्तरण गरिन् । कार्यक्रममा वडा सदस्य गोविन्द बराल, निवर्तमान वडा सदस्य किरण गौतम र वडासचिव सविता ढुंगाना, खेलकुद पत्रकार मञ्च गण्डकी अध्यक्ष दीननाथ बरालले पनि खेलकुदको महत्वबारे बोलेका थिए । पोखरा महानगरमा ३३ वटा ओटा छन् । अन्य वडाहरु पनि बेलाबखत कुनै न कुनै प्रतियोगिता गरिरहेका छन् ।

Related News

सम्बन्धित समाचार

hero news full width