पोखरा । पोखरा २६ को भवानी कालिका माविमा डिजिटल प्रविधिको स्माट डिभाइस तथा जेरो क्लाइन्ट नेटवर्क जडान गरिएको छ ।

कक्षा कोठामा जाँदा शिक्षकले चक, डस्टर तथा मार्कर पेन लिएर जानुको सट्टा अब कम्प्युटर किबोर्ड र माउस प्रयोग गरी शिक्षण गरिने भएको छ । जसका लागि कक्षाकोठामा राखिएको प्रोजेक्टरसहितको सेतो बोर्डमा पाठ्यपुस्तका विषयवस्तुलाई सजिलैसँग देखाउन सकिने भएको छ ।

पोखरा महानगरपालिका र गण्डकी प्रदेशको आर्थिक सहयोगमा कक्षा नर्सरीदेखि कक्षा १२ सम्मका १९ वटा कक्षा कोठामा नयाँ प्रविधिको स्मार्ट डिभाइस जडान गरिएकोे हो ।

पोखरा २६ का अध्यक्ष नरेन्द्र थापाले नयाँ प्रविधिसहितको स्मार्ट डिभाइसको मंगलबार उद्घाटन गरे । उनले समयको मागसँगै विद्यार्थीलाई प्रविधिमैत्री पठनपाठनका लागि अग्रसर बनाउनुपर्ने सुझाव राखे ।

कार्यक्रममा विद्यालय व्यवस्थापन समितिका अध्यक्ष चिनिया थापा, प्रधानाध्यापक रमेश भट्टराई, सहायक प्रअ किरणराज न्यौपाने र कम्प्युटर शिक्षक विक्रमराज चापागाईंले विद्यालयमा जडान गरिएको नयाँ प्रविधिले विद्यार्थीको पठन पाठनमा थप सहयोग पुग्ने विश्वास व्यक्त गरे ।