पोखरा । पोखरा फोटोग्राफर संघको टोली चारदिने अवलोकन भ्रमण पूरा गरेर पोखरा फर्किएको छ । संघमा आबद्ध फोटोग्राफर सम्मिलित भ्रमण टोली ‘आन्तरिक पर्यटन प्रवद्र्धन गरौं, सिप दक्षताको विकास गरौं’ नाराका साथ कोरोला नाका पुगेर फर्किएको हो । गत १० चैतमा पोखराबाट हिंडेको टोलीले पर्वतको कुष्मा, म्याग्दीको बेनी, तातोपानी, मुस्ताङको लेते, मार्फा, जोमसोम, मुक्तिनाथ मन्दिर, लोमान्थाङ हुँदै कोरोला नाकासम्म पुगेको कार्यक्रम संयोजक शंकर कोइरालाले बताए ।

भ्रमण टोलीको नेतृत्व संघका अध्यक्ष रामचन्द्र पोख्रेलले गरेका थिए । टोलीमा निवर्तमान अध्यक्ष जनकराज तिवारी, सल्लाहकार एवं पूर्व अध्यक्षहरु घनश्याम पौडेल, दुर्गाप्रसाद पौडेल, सचिव देवानन्द पोख्रेल, सदस्य विनय श्रेष्ठ, अग्निधर तिमिल्सिना लगायत १८ जना सहभागी थिए । भ्रमण अत्यन्तै फलदायी भएको संघका अध्यक्ष पोख्रेलले बताए ।