पोखरा । वन विज्ञान अध्ययन संस्थान, मातहतको वन क्याम्पस पोखरामा भएको स्वतन्त्र विद्यार्थी युनियन (स्ववियु) चुनावमा अनेरास्ववियु र अखिल क्रान्तिकारीको समूह विजयी भएको छ ।

आइतबार भएको स्ववियु चुनावको मतपरिणाम अनुसार अनेरास्ववियुका समीर कार्की अध्यक्षमा निर्वाचित भएका छन् । उनले २ सय ९५ मत ल्याएर जियी हुँदा प्रतिष्पर्धी नेपाल विद्यार्थी संघका मुबारक अलिले १ सय ३६ मत पाए । सचिवमा अखिल क्रान्तिकारीका धिराजन परियार निर्वाचित भए । धिराजनले २ सय ७७ मत ल्याउँदा नेविसंघका कीर्तन पण्डितले १ सय ४९ मत पाए ।

कोषाध्यक्षमा सुस्मिता कोइराला विजयी भइन् । उनले २ सय ८२ का ल्याएर विजयी हुँदा नेविसंघकी कीर्ति कँडेलले १४७ मत ल्याइन् । सदस्यमा महादेवसिंह कुशवाह, अनिशा आचार्य, दीपा कार्की, गरिमा गुरुङ र लोकराज थापा निर्वाचित भए । क्याम्पसमा ४ सय ८० मतदाता थिए । जसमा ४ सय ३४ मत खसेको थियो । स्ववियु चुनावका लागि एमाले निकटको अनेरास्ववियु र माओवादी निकटको अखिल क्रान्तिकारीले गठबन्धन गरेका थिए ।

विद्यार्थीको नामावली सार्वजनिक नभएको विरोधमा नेपाली कांग्रेस निकट नेविसंघ र नेकपा माओवादी केन्द्र निकट अखिल (क्रान्तिकारी)ले निर्वाचन अधिकृतको कार्यालयमा तालाबन्दी गरेका कारण चैत ५ मा चुनाव हुन सकेको थिएन ।