पोखरा । माओवादीले समर्थन फिर्ता लिएसँगै वर्तमान सरकार अल्पमतमा छ । नयाँ सरकारको नेतृत्व कुरेर बसेको कांग्रेसले शनिबार पत्रकार सम्मेलन गरेर वर्तमान सरकारलाई मार्ग प्रशस्त गर्न सुझाएको छ । ‘अपमतमा परेर पुनः बहुमत जुटाउने सम्भावना नरहेको अवस्थामा सरकारले मार्ग प्रशस्त गर्नु प्रदेशको हितमा हुनेछ,’ कांग्रेसले भनेको छ ।

तर मुख्यमन्त्री खगराज अधिकारीले भने संसद ‘फेस’ गर्ने प्रतिक्रिया दिएका छन् । उनले संवैधानिक बाटो अनुसार सरकार चल्ने जवाफ दिएका हुन् । ‘संविधानको व्यवस्था अनुसार म संसदमा उपस्थित हुन्छु । संसदले निर्णय दिन्छ । सरकारको छिनोफानो संसदबाट हुन्छ,’ उनले भने । माओवादी र राप्रपासहित ३२ सांसदको समर्थनमा अधिकारी नेतृत्वको सरकार बनेको हो । माओवादीका ८ सांसदले समर्थन फिर्ता लिएपछि सरकार अल्पमतमा परेको छ । ६० सांसद रहेको गण्डकीमा सरकार बनाउन ३१ सिट चाहिन्छ ।

नेपाली कांग्रेसले आइतबार सांसदहरुको हस्ताक्षर संकलन गरेको छ

सरकार अल्पमतमा परेसँगै नयाँ गठबन्धनमा सरकारको नेतृत्वलाई लिएर रस्साकस्की चलेको छ । माओवादीले अबको मुख्यमन्त्री आफूले पाउनुपर्ने दाबी गरेको छ भने कांग्रेसले पनि मुख्यमन्त्री छोड्ने अवस्था देखिँदैन । यद्यपि दुबै दल केन्द्रको निर्णय मान्न राजी छन् । ‘सरकार कसको भन्ने निर्णय केन्द्रले गर्छ,’ कांग्रेस संसदीय दलका नेता सुरेन्द्रराज पाण्डेले भने, ‘हामी माथिको निर्णय मान्न सहमत भएका छौं ।’

माओवादीले सरकारलाई दिएको समर्थन फिर्ता लिनु अघि शुक्रबार नै दुवै दलबीच अनौपचारिक बैठक भएको थियो । नयाँ गठबन्धनको प्रमुख घटक नेपाली कांग्रेसले सांसदहरुको हस्ताक्षर संकलन गरेको छ । आइतबार संसदीय दलको बैठक बोलाएर सबै सांसदको हस्ताक्षर संकलन गरिएको हो ।