पोखरा । कास्कीको माछापुच्छ्रे गाउँपालिकाको १६ औं कार्यपालिका बैठक शनिबार खुमैंडाँडामा भएको छ ।

पर्यटन प्रवद्र्धनका लागि पर्यटकीय डाँडा खुमैमा बैठक राखिएको माछापुच्छ्रे गाउँपालिकाका अध्यक्ष मिनबहादुर गुरुङले जानकारी दिए । पछिल्लो समय खुमै जाने आन्तरिक तथा बाह्य पर्यटक बढेका कारण त्यस क्षेत्रको पूर्वाधार विकासका निर्माणमा बैठक केन्द्रीत भएको उनले बताए ।

‘केही महिना यता हाम्रो पालिकामा पर्ने खुमैं डाँडामा पर्यटकको आगमन धेरै भएको छ,’ अध्यक्ष गुरुङले भने, ‘पाहुनाहरु त आउनुभएको छ । तर, उहाँहरुका लागि के आवश्यक छ भनेर बुझ्नका लागि अवलोकनसहित पालिकाको बैठक नै यहाँ राखिएको हो ।’

बैठकले सरीपाखा–खुमै–कोर्चांसम्मको रुटलाई पर्यटकीय पदमार्ग घोषणा व्यवस्थापनको काम अघि बढाउने निर्णय गरेको प्रमुख प्रशासकीय अधिकृत बेदहरी अधिकारीले जानकारी दिए । योसँगै हिमाली क्षेत्रको जलवायु परिवर्तनको असर न्यूनिकरण, सरसफाई, कार्वन व्यापारको बजेटमा गाउँपालिकाको अधिकारका लागि पहल गर्ने लगायत निर्णय गरिएको उनले बताए । ‘खुमैंडाँडामा बसेको कार्यपालिका बैठकले जलवायु परिवर्तनलाई न्यूनीकरण गर्न सरसफाईमा ध्यान दिने अनि कार्वन व्यापारको बजेटमा गाउँपालिकालाई अधिकारी हुनुप¥यो भन्ने निर्णय भएको छ,’ उनले भने ।

खुमैडाँडा पुुग्ने आन्तरिक पर्यटकको संख्या दिनप्रतिदिन बढ्दो छ । पर्यटकको संख्या बढ्दा त्यहाँका ३ होटल सञ्चालकलाई भ्याइनभ्याइ छ । समुन्द्री सतहबाट ३२४५ मिटरको उचाइमा रहेको खुमैडाँडाबाट २ घण्टा हिंडेर कोर्चां पुगिन्छ । कोर्चाङ ३६८२ मिटरको उचाईमा छ ।

स्थानीयले ग्रेट माछापुच्छ्रे ट्रेल नाम दिएको सरीपाखा–खुमैडाँडा–कोर्चां पदयात्रा पोखराबाट २ दिनमै सकिन्छ । पोखराको हेम्जादेखि सरिपाखासम्म १३.३ किलोमिटर मोटर यात्रामा पुगिन्छ । त्यसपछि ५ देखि ७ घण्टको हिंडाईपछि खुमै पुग्न सकिने माछापुच्छ्रे गाउँपालिका वडा नं १ का वडाध्यक्ष ईन्द्रबहादुर गुरुङले जानकारी दिए ।

खुमैभन्दा माथि बासको व्यवस्था नभएकाले पहिलो दिनको रात त्यही कटाएर भोलीपल्ट बिहान २ घण्टाको हिडाईंपछि कोर्चां डाँडासम्म पुगेर पोखरा फर्कन सकिने वडाध्यक्ष गुरुङले जानकारी दिए ।